Monday, November 16, 2009

لعن الله من أيقظها


أنا مقاطعه الشروق الجزائرية
اليوم السابع المصرية
الخبر الجزائرية
القاهرة اليوم (عمرو اديب/ احمد موسى) - اوربيت
ومودرن سبورت - مدحت شلبي
الناس اللي فوق دول ولعوا الدنيا بين مصر والجزائر وكان أخر نتيجه للي هم بيعملوه الاعتدائات اللي حصلت امبارح في الجزائر علي المصرين اللي بيشتغلو هناك
الشروق قالت ان في جزائرين اتقتلو في مصر والاشاعه دي كانت السبب في اللي حصل امبارح في الجزائر واليوم السابع بترد عليهم النهارده عشان الحريقه تكمل
عيب اوي ان ماتش كوره يكون السبب في كل اللي بيحصل ده, عيب أوي ان يكون في بينا دم واحنا اللي في يوم دفعنا دمنا عشان نحمي بعض
عيب لما نكون اخوات ونقف نشتم بعض ونخوض في أعراض بعض
وعيب أكبر لما نكون عايزين نقتل بعض بدل مانقف نحمي بعض
عيب ان الأمن المصري يحمي الجزائرين في مصر
وفضيحه ان الجيش هو اللي يحمي المصرين في الجزائر
الشعب المصري هو اللي يحمي الجزائرين في مصر وشعب الجزاير يحمي المصرين هناك
احنا اخوات والفتنه نائمه لعن الله من أيقظها
لو واحد بس من الشعبين اتقتل يوم الأربع أعتقد ان دمه هيكون علي ايدنا كلنا
عدونا الحقيقي قاعد في أسيا علي قلبنا والاشاعات بتقول انه كان بينقل اللي بيحصل امبارح في الجزاير علي شريط التليفزيون الرسمي
أنا بحب الكوره جدا لكني بحب وطني العربي اكتر
أيا كان اللي هيكسب يوم الأربع فهو هيكون العربي الوحيد في المونديال
وأيا كانت نتيجة الماتش فمصر والجزائر هيفضلو اخوات، واللي بيولعوا في الدنيا مايهمهمش في الموضوع غير انهم يبعوا عدد نسخ أكبر أو يبقي عندهم اعلانات أكتر
انضم لحملة المطالبه بمقاطعة الجرايد والبرامج دي وأطلب من كل عاقل تعرفه انه يكتب عن الموضوع ويفكر الشعبين اننا اخوات غصب عن الناس دي
الصوره من مدونة البريد اليومي الجزائريه

12 comments:

م/ الحسيني لزومي said...

هكذا يلعب اعلام الانظمه الفاسده بعقول رعاياه حتي لا ينتبهوا الي فساده
---------------

من اجل
وطن آمن مستقر...حياة افضل.
من اجل
محاربة الفساد....مقاومة التزوير
من اجل
ان تكون مقدرات هذا الوطن بأيدينا
شارك في الحملة الشعبيه للقيد بالجداول الانتخابية
ضع شعار الحملة علي مدونتك

maio0oya said...

يارب يستر بجد
انا بقي ايدي علي قلبي
ومن المستفيد من ورا كل ده
ناس مش هايهمها حاجه
لو حتي الاف ماتو من الشعبين
ربنا يستر ويعديها علي خير
مكنش ماتش كوره الي يعمل فينا كده


اسمحيلي يااسراء هاخد البوست
انزله في منتدانا
مع الاحتفاظ بحقك طبعا

سمكه واحده said...

صح والله
ياريت نفوق ونفهم بقي بلاش نغمي عنينا بأدينا
حاجه تكسف
احنا مسلمين
معرفش جري ايه
ربنا يسترها
دي فتنه من فتن الزمن

Israa El-sakka said...

الحكومات هي اللي مستفيدة من وجع القلب ده ...يغيبوا الناس و خلاص

Unknown said...

م/ الحسيني لزومي :

اها وربنا شكلها مش هتخرج من تحت ايد الحكومات العربيه

Unknown said...

maio0oya :

ربنا يستر فعلا يامي ويوم الأربع يعدي علي خير

اتفضليه البيت بيتك

Unknown said...

سمكه واحده :

جري اننا تقريبا كلنا بناكل أكل مسرطن وبنشرب ماية مجاري ونتنفس سحابة سودا طلع الموضوع مش في مصر بس
فطبيعي ان كلنا نلسع

Unknown said...

Israa El-sakka :

هم الاسرائات دايما كده عاقلين
:D

نورتيني

اقصوصه said...

نعم والله

لعن الله من ايقظها

طوبه فضه وطوبه دهب said...

ربنا يهدى ونفتكر اننا اخوات فى الاسلام قبل اى شىء

حلم بيعافر said...

والله كله مسئول مش اللى انت ذكرتيهم بس
تقبلى مرورى

FemTo said...

يعني انتي لما بتقري الاخبار في الجرايد بتصدقيها كلها ؟؟؟؟؟؟؟؟؟ هو اصلا دي حاجة في النفسية من زمان وللي حصل طلعها مش اكتر .انتي ليه مش عاوزة تصدقي انهم همجين وبيكرهو المصريين .. ده غل مش حاجة عادية وكورة جلد

 

The Lost Princess © 2008. Design By: SkinCorner