Thursday, July 9, 2009

....


الكتابه عن حد قريب من الكاتب هي أصعب أنواع الكتابه من وجهة نظري
يمكن لأني مهما قلت من كلام استحاله أقول هم ايه بالنسبه ليا وناس قليلين اوي هم اللي بيعرفوا يوفوا القريبين منهم حقهم في الكتابه وبيكونو من وجهة نظري أبرع الكتاب

يمكن هي مش اللي معايا طول الوقت احنا اه كل خروجتنا مع بعض لكن في المشاوير العاديه مش بتكون موجوده
رغم ده في حاجه بتربط بيني وبينها ممكن أي حد يلاحظها, أقرب تعبير عن الحاجه دي كان من اختها لما قالت اننا روحنا قريبه من بعض
لكن أعتقد ان التعبير الأصح هو اننا فينا من روح بعض
طبيعي اني مهما اتكلمت وضحكت انها تسالني في ايه وتصمم علي السؤال وإن جميع محاولاتي للنصب واني كويسه تعدي علي الجميع الا هي لحد ما أعترف, طبيعي اني لو مخنوقه هي تعيط قبلي, وطبيعي اني لو مبسوطه هي تضحك من قلبها قبلي
طبيعي انها تعرف حالتي الحقيقيه من كلمة ألو أو من أول نظره لما تشوفني
طبيعي إنها تساندي في جميع قرارتي حتي لو مكنتش فاهمه إيه سببها, كان طبيعي كمان انها تقولهم زمان سيبوها محدش له دعوه بيها مش هنبقي احنا كمان عليها رغم انها زيهم مكنتش فاهمه ايه اللي حصل
وعشان كل ده طبيعي فكان بردو طبيعي ان قلبها يوجعني , وإني أتمني أنا بس اللي أحس بده بالنيابه عنها
ياربي انت عارف كلهم مهمين عندي ازاي, وعارف هم عندي ايه, وانت الوحيد اللي تقدر تعمل كل حاجه
يارب حلها من عندك
صافي قلبك وجعني اوي, وأكيد مفيش أعز منك أدعيله من قلبي



أحمد البيت من غيرك وحش جدا
ماتتخيلش احنا مفتقدينك إزاي
انت أه مش طول اليوم معانا وزي أي حد خارج طول اليوم
بس الوقت اللي بتقضيه معانا فارق معانا أوي, بس يالا ياسيدي ولا يهمك, المهم انك تقضي وقت جميل وتتبسطوا, ترجعوا بالسلامه ان شاء الله

7 comments:

maioya said...

معاكي ان الكتابه عن حد قريب
صعبه اوي لان في ناس
عمرهم مهما كتبتي عنهم
انك تقدري توفي حقهم بكلمه
وقليل اوي انك تلاقي حد
يستاهل انك تكتبي عنه
ربنا يرجعلك الغايب بالسلامه
ومش يوجع قلبك علي حد قريب
ويفك كرب كل مهموم يارب امين
:)

حاسوباتيه said...

ربنا يخليكم لبعض يارب ويجمعك معاهم على خير

الازهرى said...

بصراحة مش عارف أقولك ايه ؟
انت عندك حق فى كل كلامك
القريبين مننا لو بنقضى معاهم ولو ثوانى اكيد بتفرق

ربنا يخليكم لبعض ويزيد ما بينكم ويفرحكم دايما

elsha3er said...

السلام عليكم

جميلة المشاعر دى ويارب دايما تكونوا قريبين من بعض


تحياتى


احمد الشاعر

micheal said...

متفق معاكي ففعلا لان ساعتها بتبقي أحاسيس الواحد مسيطرة عليه أثناء الكتابة فبتعطل تفكيره
ربنا يرجع أحمد بالسلامة
تحياتي

elsha3er said...

السلام عليكم

اتأخرتى علينا طمنينا حتى بتعليق ويارب تكونى بخير


تحياتى

احمد الشاعر

كتكوته said...

ربنا ما يحرمكم من بعض ابدا....لان البعاد والفراق اصعب ما في الكون

 

The Lost Princess © 2008. Design By: SkinCorner