Wednesday, April 15, 2009

مروان وحسن ومصر

















النهارده بتعدي سنة جديده علي اعتقال أسد العروبه الجريح الشهير بمروان البرغوثي

مروان
كان أخر الاصوات والوجوه النظيفه في حركة تحرير فلسطين الشهيره بفتح
أعتقد ان المنظمه نست اسمها قبل الاختصار واكتفت بانها فتح أي حاجه وخلاص الا انها تكون فتح أرضها وتحريرها
غريبه فعلا ان يجي ميعاد ذكري اعتقال البرغوثي في الوقت اللي مشاكل الحكومه المصريه مع حزب الله وقائده السيد حسن نصرالله بتغطي علي كل الأخبار التانيه وكأن التاريخ ده هيفضل نقطه سودا ضد المقاومه والمقاومين الشرفاء
الشعوب العربيه عموما بتفخر بوجود حزب الله فيها وانهم عرب زينا, ناس كده يخلونا نقدر نرفع راسنا لما نقول اننا عرب, ناس ردولنا كرامة العروبه وكل فترة بيأكدو ان الوهم الصهويني مش أكتر من وحش علي الورق وإن العزيمه القويه لأصحاب الحق تستطيع تمزيقه بكل سهوله
كلنا تقريبا جربنا كلام السيد حسن نصر الله قبل كده, الصهاينه نفسهم قالوا كتير انهم بيثقوا في كلام الراجل لأنهم جربوه وعمره ماكدب
وكلنا كمان جربنا كلام الحكومه المصريه بدل المره أكثر من 25 سنة
لما حسن نصر الله يقول ان أعضاء من حركته تواجدو في مصر من أجل تقديم مساعدات لغزة وتهريب سلاح للمقاومة وان أمن مصر خط احمر عنده هو وحركته وتيجي الحكومه تقول إن أعضاء حزب الله في مصر كانو موجودين عشان يعملو عمليات تخريبيه وإغتيالات وأفلام هندي يبقي إحنا نصدق مين؟
الراجل اللي الدنيا كلها بتصدقه لأنه عمره ماكدب دي حاجه, وتاني حاجه لأنه مش بيخاف من حد عشان يكدب أصلا والأهم بقي اننا عارفين ان أخلاق حزب الله تقول انهم يساعدو المقاومه في غزه اه لكن انهم يخربو في دوله عربيه تانيه أكيد لأ
ولا نصدق الحكومه اللي بتكدب علينا كل يوم قبل الأكل وبعده؟
أي بني أدم عاقل هيصدق كلام حسن نصر الله طبعا خصوصا ان الراجل بتاعه مقبوض عليه من شهر 11 اللي فات
ويتبقي السؤال اشمعني الحكومه افتكرت تنشر الموضوع ده دلوقتي؟؟؟
ويجي الرد من أستاذ فهمي هويدي في صيغة سؤال في برنامج العاشره مساءا ويسأل هو التوقيت ده له علاقه بالانتخابات في لبنان
أعتقد ان كده المسأله بقي شكلها وحش أوي وعيب علينا أوي
ربنا يهدي أبو الغيط لأنه شكله مافيش وراه أي حاجه غير حسن نصر الله, مايروح يشوف المركبتين اللي مخطوفين في الصومال ولا دي مش مسؤلية الخارجيه ولا هي الخارجيه المصريه تخصص حزب الله وحسن نصر الله وبس؟

15 comments:

FemTo said...

لو انتى بتبقى مرتاحة لو حد حاطط سكينة على رقبتك عشان هو ابن حلال ده شى يرجعلك وطبعا حرية شخصية .. وبخصوص الصومال والكلام ده وجهة نظر غريبة يعنى بتحرمى المعاقين من حق الحياة , خطوة على الطريق وممكن الحاجاة دى هيا للى توحدنا عشان مست امن واقتصاد بلد ليها فضل علينا سواء انكرتى او وافقتى

Unknown said...

FemTo :

أحمد أحب أقولك أولا كده ان اختلاف الرأي لا يفسد للود قضيه لأننا هنختلف أوي دلوقتي
(:

اللي حاطط سكينه علي رقبتي ورقبة المصرين كلهم والعرب كمان هي اسرائيل مش حزب الله
فياريت من البدايه كده نفهم مين عدونا ومين صاحبنا؟

الجزء بتاع الصومال انا مش فاهماه يعني ايه بحرم المعاقين من الحياه؟
المعاقين دول تقصد بيهم احمد أبو الغيط يعني؟
لو دي حقيقه رغم اني معتقدش انك تقول عليه كده فأنا والله ماعرف انه معاق وان كان ميجيش غير ذهنيا

احنا اللي يوحدنا اننا نساعد بعض ونقف في وش عدونا الصهيوني الأوحد
ولو انت شايف انهم مجرمين اوي كده ومسو أمن واقتصاد البلد اللي هم ماجوش جنبه والراجل قايل في التحقيقات اللي اتنشرت ان أمن مصر خط احمر وانهم ممنوع يعملو عمليات ضد اسرائيل في مصر
لكن لو انت رغم ده شايف انهم وحشين يبقي علي رأي انونيموس اللي علق عند نواره
أبطال تفجيرات ايلات كمان لازم يتحاكموا
لأنهم بقي عملو عمليات وتفجيرات من أرض الاردن والاردن مكنتش موافقه
ودي ناس بقي اتحركت وفجرت بجد
ايه رأيك؟
نحاكم الكل؟
ولا نخلي عندنا دم ونساعد بعض يمكن يكون الوقت لسه ماعداش
عايزاك تقرأ اعترافات الراجل وتسمع خطاب حسن نصر الله
أعتقد ممكن تغير وجهة نظرك

FemTo said...

اولا الاول لازم تعرفى هما كانو بيخططو لايه زى مطلع فى تقرير النائب العام .. المجرى الملاحى للى هو بياكل ناس وبيخلى الكليات للى بندرس فيها باسعار زى للى بنتعلم بيها موجود .. ومش حكمل كلام بصراحة عشان كلمة

نخلى عندنا دم

انا معنديش كملى كلام عشان انتى عندك

AHMED SAMIR said...

الحملة القومية لمحاربة كل ما ينتمي للمقاومة بصلة
فعلا في غاية السخافة والاشمئزاز

بنت أبيها said...

كلام منطقي جدا
بالظبط نفس اللى كنت بفكر فيه

والنبي بدل ما يشغلوا بالهم باثارة الفتن بين العرب والاشاعات

ما يبصوا لامن المواطن داخل بلده

عندنا في بني سويف فيه عصابات خطف الاطفال للمتاجرة في الاعضاء بتاعتهم

ليه دي ماتكونش ليها طوارئ لحد ما تنتهي

حسبنا الله ونعم الوكيل

الازهرى said...

للاسف تختفى الحقيقةوسط كل تلك الاكاذيب ولا يمكننا ان نحدد مت تصصدق ومت تكذب
فلم يعد احد ينحدث لغة واضحة
ولم تعد الاحداث بذلك الوضوح ايضا

blue-wave said...

والله انا بستغرب
لما ثائر زى البرغوثى يبقى فى السجن
وعميل يبقى فى الحكم
لنا الله

No Fear said...

السلام عليكم
النهاردة كمان ذكري إستشهاد الرنتيسي
ربنا يرحمه و يرحمنا

akeed said...

اختلف معكِ فى هذا لان هذا الشخص لا يجب ان نفخر به حيث انه شيعى يسب الصحابة ويسب امهات المؤمنين فعقيدته فاسدة فكيف نفخر بانسان ذو عقيدة فاسدة ولو قلنا انه يريد ان يساعد غرة عن طريق مصر فلما لم يحاول ان يضرب صواريخ من عنده كما فعل فى حربه ضد اسرائيل وو صلت صواريخة الى تل ابيب فإنه لا يخاطب مجانين انه يخاطب اناس عقلاء

Unknown said...

FemTo :

انت شكلك يااحمد مصدق انهم كانو هنا عشان يخربو في مصر
ومين قال انهم هيجوا جنب المجري الملاحي
انت بتصدق الحكومه ولا ايه؟
لأ نخلي عندنا دم دي اننا نساعد بعض ونقف جنب بعض عشان ده واجب الناس اللي أرضهم محتله علينا
لو مكنش عشانهم
أهو تامين لحدودنا احنا وخلاص
انا بجد مش عارفه انت مقتنع بمبررات الحككومه ازاي

بنوتة said...

مش عارفة اقول اية

بس حرام اللى يحصل دة

تحياتى

يا مراكبي said...

فعلا الموضوع بقى بايخ وسخيف وبجد شكلنا بقى وحش قوي ومكشوف

وبيتعاملوا مع القضية بنفس طريقة المختل عقليا اللي بيلفقوله التهم

Tamer Nabil Moussa said...

السلام عليكم

فتح دى كانت زمان

دلوقتى بقت تخريب

ربنا يصلح الحال

تحياتى

عرب بس said...

مدونة رائعة ومواضيع جميلة ... المواصلة والمتابعة والاضافات الدائمة والتجديد سبيل التميز فى عالم المدونات

عرب بس http://arabbas.blogspot.com

تعليم كمبيوتر تعليم انترنت دين ممتع ثقافة لذيذة برامج هامة للنساء فقط من هو؟ سياسة وصراحة أجهزة حديثة تكنولوجيا غريبة كلام أبكانى وأحيانى شاهد ولن تندم إضحك من قلبك

أسماء - فلسطين للأبد said...

أحد الأشخاص قام بانشاء حجرة على برنامج البالتوك الشهير للمحادثة ليسب الرسول بالرسائل والصورالتى يرسلها لأكثر من مائة الف شخص يومي وقد قام بعض الشباب الغيورين على الاسلام بتقديم شكوى لشركة البالتوك فطلبت الشركة تصويت 4 مليون مسلم حتى تغلق هذه الحجرة ربما تريد الشركة أن تعجزنا حتى لا تغلق الحجرة ، فلنثبت لهم إذن أننا لن يمنعنا من نصرة نبينا مانع

للتصويت على هذا الرابط

http://www.petitiononline.com/Steyr/petition.html

رابط المجموعة على الفيس بوك

http://www.facebook.com/group.php?gid=24590627728

 

The Lost Princess © 2008. Design By: SkinCorner