Wednesday, July 2, 2008

....


هو إنتي ليه بتيجي عليا؟ عشان بسكت وما بتكلمش ومابشتكيش؟

مش كل حد ساكت يبقي مبسوط ولا كل حد مش بيشتكي يبقي مابيتألمش

في ناس مابتعرفش تشتكي, في ناس بتفضل إنها تكتم جواها وتبتسم في وش الكل

دايما في المواقف الصعبه بيكون مطلوب مني اني أواسي حد

دايما لازم أقول إني كويسه وكله تمام ومفيش حاجه لأن دايما حد بيسبقني وياخد دور الضحيه حتي لو مكنش من حقه

دايما لما بحتاج حد ياخدني في حضنه بيكون في حد لازم انا اللي أخده في حضني

كتير بضايق من نفسي وأقول إني لازم أقول لأ بقي لازم أقول اللي جوايا, لكن وقت الجد ألاقي ضحكة معرفش طلعت منين وأقول إني مش زعلانه ومفيش حاجة ولو حد قال إنه لمح دموع في عيوني بقول إنه بيتهيأله وإنها بتلمع من الفرحه

يوم مالدكتور قال إني تعبانه رغم إنه سألني وقلت إني كويسه, يومها قال هي ليه مابتشتكيش؟

أنا ابتسمت وقلت لنفسي إن الشكوه لغير الله مذله

دايما بسكت ودايما بطلع أنا اللي غلطانه وأنا السبب, هو لازم أتكلم عشان مبقاش غلطانه؟

بيقولو ان القلب اللي مابيشتكيش هو القلب الأقصر عمرا

يمكن عشان كده عمري ماشفت نفسي ست عجوزه

36 comments:

Mony The Angel said...

geet..
w ereet..
w ma3rftsh a3alla2..
fa sebt al coment da..
w msheet...

wafaa said...

عارفة ليه فى وقت جرحك انتى اللى بتاخدى حد ف حضنك ؟
عشان انتى بنت جدعةومابتحبيش تشيلى حد همك , بس جربى تفتحى قلبك لصاحبتك اشكيلها وتشكيلك .. اعتبرينى صاحبتك كلمينى كأنك بتكلمى نفسك صدقينى هترتاحى كتير
ربنا يريح قلبك

عاشقة الوطن said...

السلام عليكم

ازيك يااسراء

تصدقي برضه انا بحس بكده لما بكون فى عز ماانا مضايقة بضحك ولما بكون عاوزة اشتكى من اللى جوايا بالاقي اللى بيشتكى ليا من احواله
ولما بكون عاوزة اعيط لازم اضحك فى وش اللى قدامى لانه مش ناقص اكتئاب

ممكن تقولى ان انا بضحك عليهم وعلى نفسي قبل ما اضحك عليهم

ربنا معانا

انا حاسة ان انا اللى بتكلم الكلام اللى انتى كتباه

تحياتى ياجميل

Noony said...

ميين سمعك

:(
نوني

Cold air said...

هاي إسراء

الظاهر إني جيت في الوقت المناسب بجد
عشان أنا حسيت في كلامك بالحزن المختلط بالإكتئاب
ويا رب أكون غلطان
بس جتلك الفرصة عشان تفضفضي عن اللي جواكي
تعالي
relaxation

و خدى الواجب حتي لو كنت عملتيه قبل كده
أهو منها نقرب كلنا من بعضنا و نساعد بعض

و يا رب البوست الجاي آجي و الاقي الفرحة منورة المدونة

و سوري لو كان كلامي ضايقك
و سلام مؤقت

maioya said...

فكرتيني باغنيه انغام
بس تعرفي هاقولك حاجه
ان في الاخر انتي اللي هاتتعبي
مش حد غيرك فحاولي تشكي همك
لو حتي لنفسك في ورقه قلم
بس مش تكبتي حاجه جواكي
عشان فعلا القلب اللي مبيشتكيش
هوا الاقصر عمر

blue-wave said...

مش عارف كدا بجد هاتتعبى اوى
بس انشاء الله ربنا هايرزقك باللى ياخدك فى حضنه ويسمع منك ويداوى كل جراحك
ولحد ما ييجى اعتبرينا كلنا الحد دا وادوشينا براحتك يا ستى

أ / أحمد عبد المنعم said...

بسم الله الرحمن الرحيم
القلب الحنون المعطاء هبة من الخالق ونعمة من الرحمن يا ليت كل الناس يملكون قلبا مثل قلبك
سيدنا محمد عليه الصلاة والسلام قال:" إذا تلاقى المسلما فخيرهما من يبدأبالسلام "
فما بالنا بمن تحرص على غرس البسمة فى نفوس الآخرين بل ونشر الرحمة فى الأفئدة لا شك أن خيريتها تزيد عند الله
لكن لا مانع من ان تتخيرى صديقة حنونة مثلك تبثينها آلامك وأحزانك لتخفف عنك بعض ما تحملين ولتزيح عنك مما تتألمين
فسيدنا محمد عليه الصلاة والسلام كان يشكو ضيقه لبعض زوجاته فها هى أم سلمة تخفف عنه بعض ضيقه صلى الله عليه وسلم وتشير عليه بآراء تزيل عنه همه وحزنه

شفـقــة و إحســــان said...

ليه الاكتئاب ده يا سوسو......البوست حلو بس حزين وفيه شجن فظيع
المرة اللى جايه اجى الاقى ضحك وفرح وكوشة وكلام من ده اوك
شفقة

ابوزياد الفاتح said...

الابتسامه تعالج كثيرا من المشاكل
والشكوى كما قلتى لغير الله مذله
باب الله مفتوح دائما امامنا
نشكو اليه
ونرفع اكف الضراعه
اما اللجوء الى البشر فهو الخيبه بعنيها
بس مش عارف ايه حكاية المدونين اليومين دول
اى نعم الدوله تمر بمرحلة اكتئاب عام بسبب ما نجده كل يوم من ارتفاع اسعار
لكن حال المدونين
اصبحةيرثى له
كل موضوعات المدونين حاليا تتميز بالحزن والكابه
ايه يا جماعه
عمرنا ما نعرف نحل مشكله بالطريقه دى
وربنا يصلح الحال
وتحياتى

أية الشقية الشعنونة said...

يا رب يديكى طوله العمر كده يا اسراء
وتشيلينا همك وتعيطينا علطول
ههههههههههههههه
انتى قوية ومتسامحة وقلبك كبير
عشان كده بتطبطبى وانتى تعبانى
ومش بتشتكى لان الشاكى دئما ده انسان ضعيف غير قادر على تحمل همومه فبيحملها للناس
وبعدين المؤمن مبتلى ديما يا اسراء
ربنا يهدى بالك ويريحك قلبك ويهديك لما فيه الخير والصلاح يا رب ديما يا اسراء
تحياتى

Unknown said...

كتير بيشيل جواه ومبيشتكيش لكن ده غلط بيحسسنا بالوحدة اكتر وبيوجعنا قوى من جوانا

تقبلى تحياتى

Abdallah Hosni said...

جميل اوى البوست ده يااسراء

انا فعلا حاسس انى بقرأ موضوع انا كاتبه

من زمان وانا عاوز اقول مثل هذه الكلمات

اول زيارة وان شاء الله هاجى هنا على طول

Unknown said...

ربنا يكون معاكي
بجد انت بتعاني بس ربنا هيريحك
أنا بقلك كده عن تجربة حصلت معاياوبتحصل يمكن الواحد يكون بيفكر بشكل غير الناس بس محدش مديلو مساحة
عموما ربنا يجيبلك الخير
كل الود

العراف said...

جميل اوى البوست يا اسراء وانا كمان بيحصلى نفس اللى بيحصلك انحنا مهما بنكون مجرحوين وزعلانين دايما بنبتسم للحياه اللى لوثها ناسها

RaRa said...

فعلا الشكوى لغير الله مذلة

goodman said...

القلب يكاد ينفجر بما فية
ليت تفريغ المشاعر يريحة
ولكن لمن نفضى بمشاعرنا؟
هذا هو السؤال

dina said...

فعلا الشكوى لغير الله مذلة انما بردو احنا منقدرش نشيل كل الحمل لوحدنا و مانقدرش ندى و بس و دايما بنحتاج لناش ثقة حوالينا عشان نقدر نشكى و نحكى و نتكلم و احنا مش خايفين مانتسمعش ولا خايفين مانتفهمش
تحياتى

Unknown said...

Mony The Angel:

المهم انك جيتي
(:

Unknown said...

wafaa:

ربنا يخليكي ياجميله

ده شرف ليا بجد

هضيفك ان شاء الله

Unknown said...

عاشقة الوطن:

هي حاله الكل بيعدي عليها

اعتقد اننا بنضحك عشان نصدق اننا مبسوطين

يمكن ساعتها نتبسط بجد

ربنا يسعدك ياحبيبتي

Unknown said...

Noony:

ومين سمعك ومين قالك أنا مش راضيه بفرقنا
هنتفارق مانتفارق انا وقلبي ماصدقنا

معرفش جت علي بالي لما قريت الكومنت

ربنا يسعدك يارب

Unknown said...

Cold air:

لأ مكنتش غلطان

تاج تاني
اه ياني

حاضر هعمله ان شاء الله

Unknown said...

maioya:

لأ مانا عارفه ان محدش هيشيل الليله غيري في الاخر

ربنا يخليكي ياميويا وهو كان موقف والحمدلله عدي

(:

Unknown said...

blue-wave:

ربنا يخليك بجد

(:

Unknown said...

أحمــــد :

كلامك جميل اوي

ربنا يكرمك يارب

Unknown said...

شفقة هانم واحسان بك:

حاضر بس كده؟

Unknown said...

ابوزياد الفاتح:

هي حاله الكل بيعدي عليها

بس الحمدلله عدت

(:

Unknown said...

أية الشقية الشعنونة:

هههههههههههه

أمين ياحبيبتي

(:

Unknown said...

هيثم الدهشان:

هو فعلا غلط ياهيثم

ميرسي علي مرورك نورتني

(:

Unknown said...

3abdallah 7osni:

ياسيدي ادي حد قالها

ربنا يسعدك يارب

ونورتني اكيد

(:

Unknown said...

كاتب مصري :

بين كل يسرين عسر

انا مؤمنة بده اوي

(:

Unknown said...

العراف:

ربنا يوفقك في حياتك يارب

(:

Unknown said...

rara:

(:

Unknown said...

goodman:

سؤال مهم

لأي حد قريب مننا بجد

(:

Unknown said...

dina:

كلامك صح يادندونه

نورتيني

(:

 

The Lost Princess © 2008. Design By: SkinCorner