Saturday, April 5, 2008

...يوم 6 أبريل



طبعا كلنا سمعنا عن إضراب 6 أبريل

وانه هيكون إضراب لأهم القوي والأحزاب السياسة في مصر

لكن اللي عجبني بجد إن أخبار الاضراب انتشرت جداااااا

وأتمني بجد ان الانتشار ده مايكونش علي النت وبس وإنه مؤيدينه مايكونوش إحنا وبس

دي بلدنا ومن حقنا اننا نعيش فيها زي ماحنا عايزين, من حقنا نتمتع بخيرها , من حقنا إن أولادنا يلاقو شغل, وإن اللي بيشتغل يلاقي مرتب يقدر يعيش منه

إحنا مش بنطلب حاجة كبيرة ولا حاجة مستحيلة ولا حاجة مش من حقنا

إحنا بنطلب أبسط حقوقنا وهي إنهم يكفلولنا حياة كريمة

هتفضل بلدنا وهنفضل ولادها

ولو احنا مادورناش علي حقنا فيها , مفيش حد هيجي لحد عندنا عشان يديهولنا

اضراب 6 أبريل أول خطوة علي الطريق الصح

شارك في اضراب 6 أبريل ومين عارف ايه اللي ممكن يحصل بعد كده؟

10 comments:

AHMED SAMIR said...

انا نسي والله ان الاضراب دة يؤتي ثماره
بس اسمحيلي يا اسراء اني اكون متشاءم واقول لك
ان ولا حاجة هتحصل ولا هتحسي بأي اضراب لان الشعب المصري شعب ميت لا يستحق الحياة لأنه لا يمتلك ارادة التغيير
ربنا يخلف ظني
تحياتي واحتراماتي

Ahmed Al-Sabbagh said...



أنا ليه هعمل الاضراب ؟؟


لما الفســـاد وقــّـفوه حـارس على وطنى
ولهيب الغلا كوانى .. وحتّ ف بدنى
لما الحرامى سرق منى اللقمة والميه
وسرق هدوءى وسكنى .. حتى من سكنى
لما الحلم حتى اتسرق .. من يومى .. من زمنى
لما النظام نسج - فى عز الشباب - كفنى
أنا قلت هعلن العصيان
فى يوم حزين مـَدنى

انا قلت هعمل الإضراب
ولم الدنيا والعالم
فى يوم ابيض على المظلوم
اسود كئيب على الظالم


لما سألت عالعيش .. قالوا مفيش
وقالو العيش على الأبونية
وسألت عالزيت .. وعزّيت
لما عرفت إن الزيت بتسعة جنيه
وسألت على حديد البُــنا
قالوا الحديد .. خلاص فى كرش البيه

انا قلت هعمل الإضراب
ولم الدنيا والعالم
فى يوم ابيض على المظلوم
اسود كئيب على الظالم


لما البشر والحجر
ووادى النيل ببنى أدمينــــه
لما زمان الوطن بايامة وشهورة وسنينه
لما الصغير والكبير
قالوا كفاية مش عايزينــة
كفاية علينا حكم سنين
تخرج الواحـــــد من دينـه

انا قلت هعمل الإضراب
ولم الدنيا والعالم
فى يوم ابيض على المظلوم
اسود كئيب على الظالم


لما المبيد صبح سرطان
يهرى ف ارضنا .. فى الزرع .. فى مواطن
لما بؤ الميه صبح وسخ داكن
لما خرب الاقتصاد .. واحد على تلـّـــهَ
قاعد وشارب وواكل وساكن
لما الشباب بيصرخ .. فى ذل ومهانة
ولا شغل ولا توظيف ولا شقة ومساكن

انا قلت هعمل الإضراب
ولم الدنيا والعالم
فى يوم ابيض على المظلوم
اسود كئيب على الظالم

تحياتى
أحمد الصباغ


zordeak said...

يا رب يا اسراء يجيب نتيجة

بس شوفى رد وزارة الداخلية اللى عملت بيان بترد بيه على الاضراب وشوفى بيقولو فيه ايه وانتى تعرفى ان دى بلد ودى حكومة ميفرقش معاها اضرابات ولا تفهم معناها اصلا :



القاهرة (ا ف ب) - اعربت الحكومة المصرية السبت عن قلقها من الدعوة الى اضراب عام الاحد احتجاجا على غلاء المعيشة التي انتشرت على نطاق واسع خلال الايام الاخيرة في مصر على شبكة الانترنت وعبر رسائل الهواتف المحمولة وحذرت من ان اجهزة الامن ستتخذ "اجراءات حازمة" ضد من يحاول التظاهر او الدعوة الى الاضراب.

واصدرت وزارة الداخلية بيانا حذرت فيه من ان "اجهزتها ستتخذ ما يلزم من اجراءات فورية وحازمة ازاء اي محاولة للتظاهر او تعطيل حركة المرور او اعاقة العمل في المرافق العامة او التحريض على اي من هذه الافعال وذلك انطلاقا من احكام القانون وحماية للصالح العام وامن المواطنين".

واتهمت الوزارة "البعض من محترفي الاثارة والتيارات غير الشرعية (...) بالترويج لشعارات مضللة والدعوة الى وقفات احتجاجية والتظاهر والتوقف عن العمل وتعطيل الاعمال يوم الاحد مما اوجد انطباعا خاطئا لدى المواطنين".

واكد بيان وزارة الداخلية ان "كافة مؤسسات الدولة وقطاعاتها الخدمية والانتاجية والدراسية ستظل على انتظامها يوم الاحد 6 نيسان/ابريل".

واضاف البيان ان "تلك الفئة الهامشية الداعية لهذا التحرك المؤثم قانونا عمدت من خلال البيانات ووسائل الاتصال الى خلق انطباع زائف بتاثيرها وبان هناك استجابة لها واشاعت روح التخوف بين المواطنين".



ونشرت صحيفة الاهرام الحكومية في صدر صفحتها الاولى خبر بعنوان "الحبس عقوبة المحرضين والمشاركين في الاضراب".


يا ريت يا اسراء يعمل حاجة بجد

يااااااااا رب

son's egypt said...

السلام عليكم
ممكن يكون الاضراب فعلا خطوة للطريق الصح
بس يلريت يكون الاضراب فلا واقع ملموس ويحقق نتايج مش مجرد اضراب وخلاص

Unknown said...

A.SAMIR:

لأ متتشأمش ولا حاجه

هو لحد دلوقتي كل الأخبار بتقول ان الاضراب فعلا نجح

ربنا يخرج الناس اللي اتقبض عليهم بالسلامه بس

Unknown said...

Ahmed Al-Sabbagh:

كومنت جميل اوي يااحمد

ربنا يوفقنا يارب

Ahmed EIssa said...

القضية مش قضية اضراب
التعليق ده يوم 7/4
القضية ان محدش فهم المقصود من الاضراب
واللي فهم هو اللي طبق
ومش الكل طبق صح
وهو من رأيي نجاح جزئي جدا لشعب لم يتعود ممارسة الديموقراطية بطريقة صحية وسليمة

Unknown said...

zordeak:

أعتقد انه جاب

كفايه انه فوق الشعب اللي كان في غيبوبه

Unknown said...

son's egypt:

أعتقد انه حقق

كفايه انه بين ان الشعب لسه بيعرف يقول لأ

Unknown said...

أحمد عيسي :

ماهو كان مطلوب يكون في نجاح حتي لو جزئي

حاجه تقول ان الشعب لسه فيه روح ومامتش

حاجه تقول انه ساكت بمزاجه مش عشانه اتخرس ومعدش يعرف يتكلم

حاجه تقول اتقي شر الحليم اذا غضب

 

The Lost Princess © 2008. Design By: SkinCorner