Wednesday, January 23, 2008

...غزة ومعبر رفح


فاكرين غزة؟
غزة ارض فلسطينية علي الحدود المصريه, لسه باقي فيها بقايا من الكرامه العربيه
أهلنا في غزة بيموتوا كل يوم في مجازر للصهاينة, لو هتلر كان موجود كان وقف يتعلم منها
مجازر ابليس بياخد منها دروس عشان يعلم القرون الجايه
أهلنا في غزة بيموتوا من المرض , بيموتو من الجوع , وبيموتو في الضلمة
خرجوا من غزة بمرضاهم علي الحدود المصريه, كان املهم ان اختهم الكبيره تفتح المعبر عشان تداوي جراحهم , وعشان تساهم في البقاء علي بقايا الكرامه اللي ماتت
لكن قلب حكومة مصر اللي بقي حجر علي ولادها من زمان , كان لازم يكون حجر أشد علي اخواتها
كان طبيعي ان المعبر مايتفتحش, كان طبيعي ان عربيات الاسعاف تقف وماتعديش, كان طبيعي ان مصر تشارك في المذبحه قصاد موافقة أمريكا علي التوريث
أصل مصر لو قالت للي بيحصل في غزة لأ, أمريكا هتقول علي جمال لأ
بعنا دم اخواتنا ووقفنا نتفرج
نسينا اننا هنقف قدام ربنا, نسينا سؤاله لينا عملتوا ايه ياعرب لبعض؟
قبل ماحد يقولي انتي عايزه ترمي مصر في نار الحرب واحنا ماصدقنا نسيناها
أحب اقولكم اني درست الجهاد قبل مايلغوا الباب ده من مناهج الأزهر
أيامها قالولنا ان العدو لو دخل دولة يبقي الجهاد فرض عين علي أهلها
وان الدوله اللي العدو علي حدودها الجهاد عليها فرض عين
طبعا بقي مفهوم ليه باب الجهاد اتلغي من مناهج الأزهر
هم العرب معدش فيهم رجاله غير حزب الله؟؟؟؟
هو كل مره محدش ينقذ غزة غير حزب الله؟؟؟
طب واحنا حتي الأدوية مش عايزين نعديها؟ الطاقه مش عايزين نعديها
أنا مش بقول نعدي سلاح, انا بقول نمرر حياة
احنا خير جنود الأرض والرسول عليه الصلاة والسلام أكيد مقالش عننا كده مجامله ولا كانت حاجه في وقتها وراحت , أحاديث الرسول و القران لكل زمان ومكان
بجد اللي بيحصل في غزة حاجة توجع القلب, واللي بيحصل علي الحدود المصريه حاجة تقرف الكلب
لو الحكومات ضمايرها ماتت , الشعوب هتفضل حية رغم عن الكل
قولوا اخترقوا المعبر بالقوة , قولوا شعوبنا ضغطوا علينا, طالما معندكوش الشجاعة انكم تفتحوه بنفسكم
اعملوا أي حاجه بس ماتسيبوش اخواتنا يموتوا علي الحدود
ماتحطوش ذنبهم في رقبتنا ودمهم في ايدينا , عشان عمر ايدينا ماهتنضف حتي لو غسلناها بكل مياة النيل
ربنا هيسألنا كلنا احنا عملنا ايه؟؟؟
واللي عنده جواب وعارف هيرد يقول ايه؟ مايهموش حاجه من كلامي, ومايقولش لأ , ومايطالبش مصر بانها ولو مره واحده بس تحاول ترفع راسنا ولو 2سم لفوق وتفتح المعبر
بس انا معنديش رد , وهقف يوم القيامة أبص في الأرض لما ربنا يسألني , هقوله أنا قلت لأ وأنا عارفه ان دي أقل حاجه ممكن اعملها
حكومتنا العربيه , مش هقولكم اتقوا الله فينا وفي شعب فلسطين لأنكم نسيتم ان في يوم هتتسألوا فيه عن كل قطة ماتت من الجوع في شوارعكم
انا بس هقول اعملوا اي حاجه انقذوا بها أسمائكم من مزبلة التاريخ
اعملوا حاجه او إرحلوا عنا في سلام

20 comments:

http://kasperb4.blogspot.com/ said...

والله يا اسراء الواحد من كتر الهم اللي على قلبه مبقاش لاقي كلام يتقال

مفيش غير حسبنا الله ونعم الوكيل
وربنا يهدينا ويصلح أحوالنا

mohamed said...

يا بنت بلدى, السلام عليكى ورحمة اللة وبركاتة,أنا بورسعيدى زيك بالضبط ,وبجد أنا سعدت جدا أن لسة فى بورسعيد شباب زيك عندهم أحساس وطنى وأنسانى رائع فكرنى بالروح البورسعيدية الاصيلة الى كنت أعرفها, بس أنا عايز أطمنك ان الحق يعلو ولا يعلا علية أبدا مهما كانت الموازين ضددة,أنا حبقى أتابع مدونتك ولما أقراها كويس حبقى أعلق عليها مع تحياتى ليكى يا بورسعيدية يا أصيلة ---محمد

الملاح التائه said...

كنت قريت زمان مقاله لإبراهيم عيسى
حكي فيها خطة الصهاينة لإفساد الشعب
الصهاينه اللى هما اللى حاكمين وراكبين على انفاسنا
مفادها انهم بيخلو الجميع متورط فى الفساد
والظلم ومشارك فيه
موظف مرتشي
طالب غشاش
أب جبان
قدوه لا تصلح حدوة لحمار مش لحصان
خطة افساد جماعي
توصلنا فى النهايه لإننا يبقى عينا مكسورة
ومانقدرش نقول حرام
لأننا بنعمل زيه ولو بصورة مختلفه
مانقدرش نقول عيب لأننا كل يوم بنعمل العيب
ونجح الصهاينه
لتوصيل الشعوب للمرحله دي
العيب فينا
فينا احنا
ويارب نفووووووق بقى
وحسبنا الله ونعم الوكيل فينااا
ويارب انتقم منا
أو استخلف من بعدنا قوما صالحين
تحياتى لإثارة الموضوع
ودمتى بخير

مصر هى أمى said...

ازيك يا اسراء

انا اما قريت البوست بتاعك افتكرت تصريح ظريف جدا فى جرنال الاخبار
كان بيقول ان بوش اما جه مصر فى اخر زيارة ليه فى الشرق الاوسط علشان يقدم للريس تقرير عن نتائج زيارته
ساعتها قولت يعنى بوش جاى يقدم تقرير للريس
بس بعد كده اكتشفت ان بوش فعلا قدم تقرير للريس بدليل ان اول ما بوش ساب المنطقة الضرب اشتغل فى غزة واحنا متكلمناش ولا فتحنا بقنا
دا طبعا تنفيذا لتعليمات ماما امريكا

مهبول ومهبوله said...

حسبنا الله ونعم الوكيل
تحياتي

يا مراكبي said...

مش دول اللي يتوجهلهم الكلام ده

لو بتكلمي حيطة كان ممكن تعمل حاجة

وممكن تحس .. وممكن تتصرف

لكن دول؟ أبدا

zordeak said...

حسبنا الله ونعم الوكييل

ومين قال يا اسراء ان لسه فيه حد فاكر يعنى ايه مسلمين

يعنى ايه اخوات

يعنى ايه عرب

الكلام ده مبقاش يهم حد دلوقتى وخصوصا حكامنا

هما دلوقتى عارفين يعنى ايه سكووت
يعنى ايه تواطوء

يعنى ايه انهزامية

يعنى ايه خووف أعمى

يعنى ايه جبن وحب الكرسى

ناقشتى حاجة مهمة اوى على بالى من زمان وهيا فكرة الجهاد

والخوف الأعمى منه مع انه فرض فى حال زى حالنا دلوقتى

بس ايه احنا فعلا دلوقتى بقينا فى اشد حالات الهوان

اشد حالات حب الدنيا وكراهية الموت

علشان كده احنا كمان هنا على ربنا ومبقاش الدعاء مستجاب

كل يوم هتشوفى من ده يا اسراء بعد كده

وانتظرى قريبا المصريين وهما متحاصرين وبيحاولو يهربو من البلد لأى حتة

واستنى مشهد زى مشهد دخول امريكا للعراق

كله جايز
متستبعديش حاجة

وحسبنا الله ونعم الوكيل كمان مرة

عاشقة الوطن said...

السلام عليكم

ازيك يااسراء

رحمك الله ياغزة
ورحم اهلك والمسلمن اجمعين

FadFadA said...

يقو أحمد مطر
قدس معذرة و مثلي ليس يعتذر
ما لى يد فيما جرى فالامر ما امروا
وانا ضعيف ليس لى اثر
عار على السمع والبصر
وانا بسيف الحرف انتحر
وانا اللهيب وقادتى المطر
فمتى سأستعر
لو ان ارباب الحمى حجر
لحملت فأسا فوقها القدر
هوجاء لا تبقى ولا تذر
لكنما اصنامنا بشر
والمكر يشكو الضعف ان مكروا
فالحرب اعنية يجن بلحنها الوتر
والسلم مختصر
ساق على ساق
واقداح يعرش فوقها الخدر
وموائد من حولها بقر
ويكون مؤتمر
هزى اليك بجذع مؤتمر
يساقط حولك الهذر
عاش اللهيب ويسقط المطر

محمد

Unknown said...

آلام وآمال :

المشكله فعلا ان معدش في كلام يعبر عن اللي بيحصل يامحمود

Unknown said...

mohamed:

وعليكم السلام ورحمة الله وبركاته

بورسعيد فيها ناس كتييييييييير كده

(:

اتمني انها تعجبك

نورتني

Unknown said...

الملاح التائه :

بالظبط مانا لما ابقي زيهم مش ممكن اقدر اقولهم لأ

وتيجي اسطوانة بقي اللي نعرفه احسن من اللي مانعرفوش

والكلام الفارغ ده

فعلا حسبنا الله ونعم الوكيل

Unknown said...

مصر هى أمى :

محمد

حمدالله علي السلامه ياباشا

ماتبقاش تغيب عننا تاني

مانا قلت هو جاي عندنا ليه؟

هو مش محتاج انه يحسن صورته مع الحكومه المصريه

انما بعد اللي حصل مع غزه طبعا بقي واضح جدا هو جه ليه؟

Unknown said...

مهبول ومهبوله:

حسبنا الله ونعم الوكسل

نورتني

Unknown said...

يا مراكبي :

لقد أسمعت لو ناديت حيا ولكن لا حياة لمن تنادي

Unknown said...

zordeak:

أعتقد ان اللي لسه فاكرين بقوا قليلين اوييييي

مش عارفه ليه الناس فعلا بقت بتخاف

لا الحرب هتقلل يوم من العمر المكتوب ولا الهروب منها هيزود يوم

كل واحد هيعيش العمر اللي مكتوبله من غير ماينقص ثانيه

هو فعلا معدش في حاجه بعديه ولا حاجه ممكن تكون غريبه

حسبنا الله ونعم الوكيل

Unknown said...

عاشقة الوطن :

ربنا يعز غزة

ويعز أهلها

Unknown said...

FadFadA:

مفيش حد ممكن يتكلم بعد أحمد مطر يامحمد

بحاول اكون said...

ازيك يا اسراء اول مره اجي عندك المدونة
بجد حسبنا الله ونعم الوكيل انا كل يوم قلبي بيتقطع عليهم انا ليا ناس قرايبي هناك مع الناس اللى بتموت ووقت ما عرفت ان خلاص ربنا كرمهم وهدموا المعبر قولت خلاص هيرتاحوا وكل واحد هترجعله حياته تاني بس للاسف عرفت بعدها انهم محجوزين في العريش والحكومة المصرية مش عاوزة تتديهم حق في الحياة
ربنا ينتقم منهم ويجرالهم اللى بيجرا لشعب غزة وكل الشعوب اللى سلبين منهم حقهم انهم يعيشوا
انا بجد نفسي اعمل حاجة بس هعمل ايه كلمة واحد لا هتودي ولا هتجيب ايد لواحدها مش هتصقف
وعمر العرب ما هيتحدوا ليوم القيامة طول مافي حكومة عاوزة الحرق زي حكومتنا
منهم اللى خلقهم هو ادرى بحكمه عليهم
موني

Unknown said...

بحاول اكون :

ازيك يامني؟

لأ ياجميله دي تاني مره

(:

ربنا يطمنك علي قرايبك يارب

لو كلمة لأ بتاعتك علي بتاعتي علي بتاعة غيرنا

يبقي هتعمل كتيييييييييير اوي

نورتيني

 

The Lost Princess © 2008. Design By: SkinCorner