Monday, December 3, 2007

..بين كلمة المتهم والشهيد فرق كما بين الأرض والسماء

ضحكنا واتفائلنا كتير نيجي للجد بقي
أكيد في كتير سمعوا عن شخص اسمه السموره وان السموره ده تاجر حشيش وبانجو في بورسعيد في منطقتي الكويت والسلام
وان الحكومه بعد بلاغات من الموطنين لمدة سنتين ماتحركتش غير لما المواطنين بعتوا البلاغات دي لوزارة الداخليه في القاهره
و أخيرا البوليس اتحرك يوم الأحد اللي فات
اللي حصل ان اثناء محاصرة قوات الأمن وافراد من العمليات الخاصه للمكان عدي تاكسي من المنطقه
التاكسي كان راكبه شاب عنده 26 سنة واسمه محمد حسن الزناتي وخاطب , ومحمد مكنش معاه فكه واخد 2 جنيه من واحد صاحبه ثمن المشوار, وقف له عم حسن محمود وده راجل كبير وعنده ابن متزوج وبنتين واحده فيهم مكتوب كتابها وولد تاني
طبعا مكنش معروف ان المنطقه دي فيها كمين او ممنوع المرور منها
واللي حصل ان السائق عدي من نفس الشارع المحاصر عشان يوصل محمد لبيته
السائق فوجئ بقوات الأمن اللي محاصره المكان وبتطلب منه انه يقف
الراجل اتخض واتلخبط ومبقاش عارف يعمل ايه وحاول انه يمشي بسرعه
الاجراء اللي المفروض قوات الأمن تاخده انها تطلق الرصاص علي كوتشات العربيه عشان تمنعها من المشي
لكن اللي حصل انهم اطلقوا النار علي العربيه واللي جواها وقتل السائق ومحمد بطلقه في الرأس
طلقه في الرأس دي ياجماعه يعني اللي كان بيضرب كان بيضرب عشان يقتل مش عشان يوقف العربيه
وفعلا فارق محمد وعم حسن الحياة
وطبعا مش محتاجين اني اقول ان الحكومه ماقبضتش علي سموره غير بعد الحادثه دي بخمس ايام
يعني الناس اللي مالهمش ذنب اتقتلوا والمجرم الحقيقي قدر انه يهرب هو وأخوه وفضلت الحكومه تجري وراه وماقدرتش انها توصله غير لما بلغ عن مكانه احد الأشخاص اللي قدر انه يتعرف عليه
نرجع لموضوع محمد وعم حسن, الحكومه نزلت بيان بأسماء أفراد العصابه اللي اتقتلوا وطبعا مش محتاجين اني اقول ان اسم محمد وعم حسن من ضمنهم
الحكومه في بيانها قالت ان التاكسي لما اقتحم المكان وطلبوا منه انه يقف, اطلق الرصاص علي البوليس والبوليس بادلهم اطلاق النار
أصل القانون يمنع انك تطلق النار علي أعزل, وماينفعش ان ظابط او عسكري يضرب رصاص لو اللي قدامه مبدأش بده او علي الأقل أشهر السلاح في وضع لاطلاق النار
طبعا بردو محدش محتاج اني اقول ان كلام الشهود العيان بينفوا ده تماما وقالو ان التاكسي مااطلقش اي اعيره ناريه, وبن عمة محمد قال انه يتحدي اي حد لو قاله ان ابن خاله كان بيشيل في جيبه قصافه مش مسدس, وعم حسن لو كان تابع تجار المخدارات مكنش هيتحكم عليه ب6 شهور في قضية شيك بدون رصيد من أقساط التاكسي اللي كان مصدر رزقه , واللي طبعا دلوقتي ماينفعش خالص من الرصاص اللي اضرب عليه
مفيش حد مابيغلطش اه, واحنا مش ملايكه ومش معصومين من الخطأ محدش قال حاجه, لكن انك تضرب رصاص علي شخصين لا يحملون السلاح وضرب الرصاص يكون بغرض القتل فده مش خطأ, دي خطيئه
انك لما تغلط في كارثه زي دي, بدل ماتعتذر تزور الحقايق وتزيفها, يبقي ده مش خطأ دي خطيئه ثانية
لما الحكومه تمارس الضغط علي عائلات الضحايا عشان يتدفنوا بالليل, يبقي ده مش خطأ دي خطيئه ثالثة
أهالي الناس دي مش عايزين غير تبرئة أسمائهم , وان بدل اسم المتهم يتكتب قبل أسمائهم الشهيد أو المقتول خطأ
في أم قلبها مليان حسره علي ابنها اللي اتقتل فبلاش نحرق قلبها بزياده ونقول علي ابنها اللي اتقتل ظلم انه تاجر مخدرات
في بنت مكتوب كتابها مش عارفه مين اللي هيجوزها بعد مقتل أبوها, فبلاش نكون السبب في ان خطيبها يسيبها لأن أبوها كان ضمن العصابه
حرام نقتلهم ظلم ونظلمهم بعد مايموتوا , مش هيبقوا اتظلموا وهم بيموتوا وبعد مايموتوا كمان
الأجل مكتوب وكل واحد مكتوب له هيموت امتي وفين ودي حاجه بتاعة ربنا
لكن ده عمره مايمنع ان الغلطان لازم يتحاسب ويدفع ثمن غلطته, واننا لازم نعترف بالحقيقه ونبرأ اسم الناس دي
حسبنا الله ونعم الوكيل
-------------------
تحديث: بعد مانكدت عليكم أقول حاجه ترفع من روحكم المعنويه بقي
الأستاذ محمد الدريني خرج من المعتقل, ألف مبروك ياحمد وحمدالله علي سلامته ويارب يكون بخير

38 comments:

لو بطلنا نحلم نموت said...

انا كويس اني اول رد
انتي خليتي جسمي يقشعر
فعلا اقسم برب العزه
يعني بلد في منتهي السفاله
بلد واطيه وحكومه زباله
وريس اهبل وحرامي
والوزراء كلهم نايمين
وكل الي همهم عليه
ان هما ما يبقشا في ارهاب في مصر
ما لما الناس تجوع
هاتسرق
ولا تسرق هاتقتل
ولا تقتل هاتقتل البني ادم العادي والحكومه
وفي الاخر هايسموا ارهابي
وهما اصلا الي ارهابيبن بالطريقه الواطيه
ديه
وعلي فكره
طبعا احنا كلنا عارفين
ان ارخص روووح هيه روح البني ادم في مصر
واراهنك
يعني قبل كده حصل ان في عماره او فندق وقع
وكان في اجااانب
ايه الي حصل
النار اطفت بسرعه رهيبه
وباجهزه في منتهي الدقه
انما لو مصريين
كانوا هاشيلوا بواقي العماره الي واقعه بالونش
الونش بقه يجي في بطن واحد صاحي
ولا في بنت صغيره بتعيط
عادي
كله في البطاطس
ربنا يهديهم
ليناااااااا
ويبقي فعلا الشرطه في خدمه الشعب
مش العكس

zordeak said...

لا حول ولا قوة الا بالله

حسبنا الله ونعم الوكيل

وانا لله وانا اليه راجعون

اللى انتى بتحكيه ده يعتبر مأساة مؤلمة

ان الناس دى تموت كده ظلم

وفى الاخر يتشوه اسمهم هما واهاليهم ويتقال عليهم متهمين فدى مصيبة

حسبنا الله ونعم الوكييل
انا اتحرق دمى وحاسس بالعجز

مش عارف نعملهم ايه دوول

نفضل نشتم فى الحكومة اللى الشتايم فيهم بتزودهم جبروووت

ولا نعيط عاللى راحو

كلها حلول سلبية

ايه الحل الايجابى اللى يتعمل

اننا نشوف الناس اللى هما شهود عيان دول ويشهدو بشهادة مكتوبة ويمضو باسماءهم ونبعت الشهادة دى للنائب العام

ونبعتها لايميل وزارة الداخلية


ونبعتها لجريدة محترمة تنشر الخبر

ونشوف اهاليهم لو محتاجين تبرعات

علشان نبقى ايجابيين وعملنا حاجة مفيدة فعلاااا

حسبنا الله ونعم الوكيل كمان مرة

:(

Dr Emad said...

حسبنا الله ونعم الوكيل

http://kasperb4.blogspot.com/ said...

لا حول ولا قوة إلا بالله العلي العظيم
وحسبنا الله ونعم الوكيل

محمد عبد الغفار said...

مش هتقدرى تعرفى الحقيقه فين ابداً

احمد الجيزاوى said...

حسبى الله ونعمه الوكيل
بس انا كنت عوز اعرف تقرير الطب الشرعى والجنه الثلاثيه قال ايه لانى دة بيفرق كتير فى القضايه التى مثل هذا لو تقدرى يا ريت تعرفينى
تقرير الطب الشرعى قال ايه ممكن نعمل حاجه
احمد الجيزاوى

أُكتب بالرصاص said...

صدق من قال ان المدونات اصبحت من وسائل الاعلام
انا شاهدت حلقة تسعين دقيقة من كام يوم ..بس متأخر شوية.زمافهمتش إيه اللي حصل
بس سمعت انهم عايزين يحولوا اللقب من متهم إلى شهيد

استغربت ، ومافهمتش القضية إلا لما قرئت البوست دا

شكرا يا اسراء

Anonymous said...

وشوشني

انا داخله وكنت عايزة اتكلم عن امدونه بما اني اول مرة ادخل بس بجد

ماينفعش
المهم بما اننا في مصر

مش هشتم الحكومه اصل مش هتفيد احنا عايزين نتغير تغير تام

كفايه الكذب والخداع والغش ونسيان ربنا اللي شايفنا دايما

المهم ان ربنا مش هيضيع حق حد ولا هيضيع حق اهالي اللي ماتوا بسبب اهمال او ممكن نقول غباء ساري على الجميع

من الاخر البلد مافيهاش امل الا لما كله يتغير ومش هيتغير بدل كل واحد ماسك في المنصب اللي هو فيه

ومش هنتغير الا لما ييجي واحد من الشعب عارف ايه اللي فيها عارف الغلط اللي هيصلحه وده مش هيحصل واحنا عايشين

فلتستمتع به الاجيال القادمه
...................
www.hwahma3.blogspot.com
شكرا على الزيارة

كراكيب عادل said...

توهان يا اسراء وحجات تخلي مخك يتمني يبطل يفكر

•«ρяoιd»•™ said...

لا حول و لا قوة إلا بالله العلي العظيم

حسبي الله و نعم الوكيل

ايه ده

ايه القرف ده

الله يحرقك يا مصر طول ما انتي هتفضلي زباله كده

و مصر تتحرق ليه

الله يحرق الحكومه فرد فرد

و الشرطه الفاسده

و الجيش اللي مالوش لزمه

الله يحرقكم

oceaneyes said...

حسبى الله وهو نعم الوكيل عليهم

ليهم يوم ان شاء الله الناس دى

كل ظالم ليه يوم


مش عارفة اقول ايه بجد


ماعنديش حاجة اقولها

دول ناس حتى الدعاولا عليهم مش بتأثر فيهم

لكن لكل اللى اتظلموا واللى ماتوا بسببهم رب يقدر ياخدلهم حقوقهم كويس جدا



والف مبروك على خروج الدرينى


تحياتى

AHMED SAMIR said...

مش جديد عليهم
كدب كدب كدب
هم بس اللي صادقين والشعب كله كداب
لا حول ولا قوة الا بالله
اموت واعرف بيعلموهم ايه في الكلية دي؟
تحياتي

son's egypt said...

السلام عليكم
انا قرات الموضع في الجرايد فعلا
ولكن للاسف ديه عاده الدخلية انها تزور الحقائق دايما ومش بتحب تعترف بحاجة صح
وابن عمه واصحابة يشهدوا ان محمد كان طيب جدا وكان علي اخلاق عاليه مش تار مخدرات زي ما بيقولوا

مروة الزارع said...

ماشاء الله يا إسراء
أنا أول مرة أدخل مدونتك
لأنى جديد فى عالم التدوين
بس بجد عجبتنى
أتمنى تزورينى

Amr Ahmed said...

يا نهار اسود

حرام بقي يا ناس

البوليس جاب اخره مع الناس

هما عاوزين ايه مننا

دي حاجة تجيب الهم

ايه القرف ده

افففففففففف

جتهم القرف

يا مراكبي said...

إنا لله وإنا إليه راجعون

للدرجة الحقيرة دي؟ دي حاجات فاقت الخيال

كل اللي في إيدينا دلوقت إن اللي متأكد من المعلومات دي يفضحهم إعلاميا زي ما عملتي إنتي كده

وده في ميزان حسناتك إن شاء الله

وحسبي الله ونعم الوكيل

shabfa2re said...

:(

dead man said...

واحنا خدنا ايه من الداخلية غير كده .. من امتى بيشوفوا شغل غير شوية الاعتقالات ... وتغيير الشعار علشان شايفين انه عيب ان الشرطة تبقى في خدمة الشعب

Unknown said...

حواديت وحكاوي:

سوري بجد اني نكدت عليكم

والبلد ذنبها ايه بس

مصر مالهاش ذنب هي زينا بتتفرج وزعلانه علي كل اللي بيحصل

المشكله ان الانسان فعلا بقي رخيص اوي في بلده

Unknown said...

zordeak:

هو من جهة مأساة فهو فعلا كده

معلش بجد اني حرقت دمك, حقك عليا

الناس دي طلعت في 90 دقيقه وقالو الحقيقه

والمفروض ان التحقيقات لسه شغاله في الموضوع ده

وان شاء الله اسمائهم تتبرأ

Unknown said...

Dr Emad:

اللهم أمين

Unknown said...

آلام وآمال:

):

Unknown said...

Mohamed A. Ghaffar:

اكيد الحقيقه هي اللي الناس بيقولوها

مش كلام الحكومه

Unknown said...

مدونه انا بحبك يا مصر:

اللي اعرفه ان التحقيقات لسه شغاله

وان في شهود عيان علي ده

Unknown said...

أُكتب بالرصاص:

يسعدني اني كنت السبب في توضيح الصوره ليك

Unknown said...

وشوشني:

اكيد ربنا دايما بيظهر الحق مهما حصل ومهما حاولو انهم يداروه او يزيفوه

اعتقد ان الأجيال الجايه مش أحسن مننا في حاجه

اللي يقدروا يعملوه احنا كمان نقدر نعمله

نورتيني

(:

Unknown said...

كراكيب عادل:

والمشكله انه رغم الأمنيه مابيبطلش

Unknown said...

•«ρяoιd»•™:

بالظبط مصر مالهاش ذنب

مصر مظلومه زيها زينا, ويمكن اكتر مننا كمان

Unknown said...

oceaneyes:

أكيد يومهم جاي

بس المهم مين اللي يعتبر من اليوم ده

لأ أكيد الدعاوي بتأثر

دي بتعمل معجزات

الله يبارك فيكي

وعقبال كل الناس اللي اعتقلوهم ظلم

Unknown said...

A.SAMIR:

هم صادقين

واللي بيحصل حالات فرديه

او ادعائات اعداء الوطن

كده يعني

لأ بيعلموهم حاجات كتير اووي

اهمها ان الشعب في خدمتهم

Unknown said...

son's egypt :

اصلهم ماينفعش يطلعوا نفسهم غلطانين

Unknown said...

مروة الزارع:

يسعدني انها عجبتك

وان شاء الله هزورك

نورتيني

(:

Unknown said...

Amr Ahmed:

الصراحه انا بردو مش عارفه هم عايزين ايه؟؟

Unknown said...

يا مراكبي:

لأ وأكتر من كده كمان

حسبنا الله ونعم الوكيل

Unknown said...

shabfa2re:

):
):
):

Unknown said...

dead man:

ايه يااحمد مالك؟

انت عايز الشرطه كمان تكون في خدمة الشعب

عيب عليك كده والله

وبعدين انت نسيت اننا خدنا منهم كليبات التعذيب ولا ايه؟

الناس مش مخلينا محتاجين حاجه اهم

أمل عبد الحكيم said...

انا اول مرة ادخل مدونتك وهى هايله
الكلام دة اول مر ة اقراة بصراحه
والفضل ليكى
بس اسمحيلى اختلف معاكى فى الطلب الحكومه مدام عملت كل دة تفتكرى هترفع الظلم اصلا مينفعشى
فى بلادنا الصح ممكن يتغلط
انما الغلط عمرة مايتصلح
وكلنا منملكش غير اننا ندعيلهم
وندعى لنفسنا نخلص بقه من الحكومه اللى ماتت اكلينكيا دى
احسن خلاص الناس كلت بعدها فعلا

أول مرة said...

كتير جداً في مآسي بتحصل في الدنيا دي
كتير جداُ الواحد يشوف الظلم و يقدر يعمل حاجه..... اللهم غير الدعاء
بالنسبه للمسمى بيتهيقالي خلاص مبقاش يفرق معهم
بالنسبه لأهاليهم ربنا يصبرهم

تحديث : بالنسبه لمحمد الدريني .... هوا كلو عند العرب صابون ... و لا ايه

 

The Lost Princess © 2008. Design By: SkinCorner