Monday, October 22, 2007

...عن فاروق اتحدث


احنا اتخدعنا ياجماعه واضحك علينا
عشنا سنين عمرنا اللي فاتت وهم بيقولولنا ان الملك فاروق راجل وحش وظالم ومفتري
انا كنت قرأت موضوع لأنيس منصور وكان بعنوان رجلين ظلمتهم مصر
الملك فاروق و محمد نجيب

وفهمت منه ان الراجل مكنش وحش للدرجه دي
وعشان كده اتفرجت علي مسلسل الملك فاروق اللي المفروض انه اول عمل درامي يتناول قصية حياة الملك
وأكيد اللي شجعني أكتر ان اللي هيقوم بدور روكي هو تيم حسن اللي بحبه جدااااا

وفعلا بدأت اتعرف علي فاروق جديد خالص
ملك ظريف جدا وبيحب بلده اوووووووووي
مكنش عميل للانجليز وكان بيتمني دخول الألمان مصر عشانهم أمنوا بحرية مصر واستقلالها, وكان بيمدهم بالمعلومات كمان
روكي -زي مانا بحب اقول عليه- كان ملك بيحب بلده وشعبه وكان مخلص لهم
ولما الظباط الأحرار بدأو مطالبهم وافق عليها كلها
ورفض ان الجيش يوقفهم عند حدهم وقال كلمه جميله اووووووووي

مش هنزل الجيش عشان يقتل بعضه

لما الانجليز حاصروا السرايه بالدبابات كان متأكد انه لو رفض مطالبهم شعبه هيقف جنبه
بس هو وافق وقال انه مش عايز حمامات دم من شعبه

فاروق كان حريص علي حياة رعيته لأبعد الحدود
فاروق مكنش وحش كده زي ماقالوا لنا في الكتب ودرسوا لنا
فاروق كان ظريف ودمه خفيف
ولما خرج من مصر خرج وقلبه مكسور
فاروق كان احسن بكتير من ناس ضحكوا علينا وقالوا لنا عنهم انهم ابطال
فاروق فعلا التاريخ ظلمه, يمكن ده لأن مصر زادت أكتر من 50 مليون عن يوم رحيله
أنصح اي حد ماشفش مسلسل الملك فارق انه يتابعه, أعتقد انه هيعجبه, وهيعرف ان فاروق كان ملك بجد

53 comments:

zordeak said...

احنا الظاهر فعلا اننا انضحك علينا

كنت زمان استغرب جدا لما الاقى بابا بيحكيلى عن الملك فاروق ويقولى انه كان كويس

كنت استغرب امال ايه اللى بسمعه عنه ده

والدى كان مصر ان الملك فاروق كان كويس وان بس الحاشية الفاسدة حواليله هيا اللى ادته الصورة الوحشة دى

الملك كان بيخاف على بلده لانها بلده وهو الملك بتاعها

انما احنا اللى شايفينه دلوقتى بيقول ان محدش خايف عليها

ولو سألتى اى حد يقولك دى بلدهم يا عم خليهم يخربوها زيادة ما هى خربانة

كنت استغرب اوى لما اشوف افلام من بتاعة زمان والاقى لو الفيلم كان فى محكمة مثلا ان الصورة فوق القاضى متخربشة

ولما سألت عرفت انها صورة المك

للدرجة دى وصلت بيهم انهم حتى مش عايزين يسيبو صورته

تشويه غريب حصل ليه ولاسمه ولصورته كان نهايته اننا بقينا بنبصله بالشكل ده

ايام الملك كان فيه دستور بيحترم جدااا
وكان فيه برلمان بيحترم جدااااا وصوته مسموع


الملك عمره ما كان شخشيخة عبيط بيحركوه زى ما هم عايزين وبيجرى ورا شهواته وخلاص

لا الملك كان انسان واعى ومؤمن بحريته وحرية بلده


انا يمكن مشفتش المسلسل بس هبدأ اتابعه

شكرا يا اسراء انك فتحتى موضوع زى ده لانى كان نفسى اتكلم فيه من زمان

:)

http://kasperb4.blogspot.com/ said...

ربنا يرحمه ويرحمنا يا اسراء

:)

Dr Emad said...

على فكره يا اسراء انا ما تابعتش المسلسل فى رمضان
مش بس علشان ظروف الامتحانات ولكن لانى كنت خايف انه يكون برضه زى كل الافلام والمسلسلات اللى بهدلت شخصيه لو حبينا نوصفها حنقول عليها ملك مصر
جمله من كلمتين يعترفوا لهذا الرجل بما كان له من حق وانا يمكن مقصدش فكره حقه ف مصر قد مقصد حقه اللى ضاع لما انطرد من بلده اللى كان بيموت فيها ويحبها جدا واللى منقدرش ننكر انها كانت بلده فعلا وعلى سمعته اللى اتبهدلت وعيلته اللى ضاعت
وزى منتى قلتى انه كان فعلا بيخاف على الناس ويحبها كتير وكان ليه مواقف مع العرب وفلسطين بالذات محصلتش من زعماء لغايه دلوقت
الراجل ده انا بحبه جدا
ويمكن انا واحمد بنتكلم فى الموضوع ده كتير وبنشوف الفرق بين الهرجله وضياع الاخلاق اللى احنا عايشينه دلوقت وبين الشياكه والاناقه والاتكيت والخير بتاع زمان
على فكره كنا حنبقى افضل بكتيييييييييييييييير
هتابع المسلسل
وربنا يرحم ملك مصر

اسكندراني اوي said...

اه ياني

اظاهر اننا اتخدعنا في حاجات كتيييييير

FemTo said...

كل سنة وانتى طيبة يا اسراء
انا مشوفتهوش صراحة بس سمعت عنه..انبارح كان فى قناة عمالين يتعركوا انه بيمهد للنظام الملكى ومش عارف ايه, لو فيه قناة حتيجبه من الاول ياريت حد يقولى

Anonymous said...

احنا اضحك علينا يارجالة ولا ايه يااااااااه عايشة 24 سنة من عمري وفاكرة الراجل ده بالوحاشة دي بتاع ستات وكلام فاضي اتاريه راجل ولاد ناس ومتربي اكيد يا اسراء هتفرج على المسلسل ده امتى مش عارفة بس اكيد هتفرج وسلامي ليكي وشكرا ياقمر على توضيح حقايق انا موش كنت اعرفها

abo salah said...

بعد السلام عليكم

الصراحة أنا ماتبعتش المسلسل خالص .. الا أنى سمعت عنه كتير .. ده إلي جانب الاكتساح العجيب و الانجازات اللي حققها المسلسل في الاستفتاء علي المستويين .. النقاد و الجماهير

اما بالنسبة للتاريخ ففعلا ظلم شخصيات كتير .. وشوه صورهم في نظرنا

وحتي وأن كان فعلا الشخصيات دي كانت فيها عيوب .. وعصورها تخللتها العيوب
الا أن كتب التاريخ وكأنها قد قدمت الحكم النهائي عليهم دون أن تجعلنا نستعرض الموضوع بالكامل و نحكم نحن علي هذه الشخصيات

بالمناسبة
لا اعتقد أن الملك فاروق أو الرئيس محمد نجيب أكثر من عانوا من ظلم التاريخ لهم

بينما اعتقد أن اكثر من ظُلم هو الظاهر بيبرس .. هذا المرة لم ينصفه العمل الدرامي كثيرا كما هو الحال مع الملك فاروق وذلك لتضاءل القيمة الفنية للعمل الدرامي عن الظاهر بيبرس

وانصح بقرأة كتاب الظاهر بيبرس للدكتور سعيد عبد الفتاح عاشور لنتعرف علي بيبرس الذي ظلمه التاريخ

اعتذر علي التطويل

وتحياتي

Ahmed EIssa said...

احنا مضحكش علينا ولا حاجة
بس مشكلتنا في التأريخ ان كل واحد بيكتب اللي بيعجبه
مفيش مصادر موثقة
مفيش مصادر بتقول الحق
والدليل علي كدة كم الكتب اللي طلع عن الثورة وضباط الثورة
منها اللي بيمجد
ومنها اللي بيشتم ويسب ويتهمهم بكل التهم
عشان كدة احنا للاسف ملناش تاريخ

bastokka طهقانة said...

احنا مش لازم نصدق كل اللي يتقال لنا مفيش شك ان المؤرخ بيكتب من وجهة نظره و محدش عارف مين صح و مين غلط

حسابهم على الله


سيبيك بقى و تعالى نلعب بازل

اوروفوار

soosa el-mafroosa said...

القلوب عند بعضيا

يا مراكبي said...

�� � ���� ������� .. �� �������� ������� ��� .. ��� ��� ���� ��� ����� ������ � ���� ���� ��� �� �� ���� ���� ����� ��� ��� �� .. ��� ���� ��� ���

��� �� ����� ��� ���� �� �� ������ ������� �� ��� ������ ���� ��� ���� �� � ��� �����ɿ ���� � .. ��� �� ������ ������� ���� ��� ����� �����

oceaneyes said...

عندك حق والله يا اسراء
...
فعلا الملك ده انظلم اوى ...انا ما تابعتش المسلسل كامل ..بس كنت قرأت المقالة بتاعت انيس منصور دى
...
وفعلا هو مظلوم
...
ربنا يرحمه
...

تــــ(حـنة)ــــر said...

هاى
بصراحة انا متبعتش اى مسلسل فى رمضان السنه دى
لكن انا كنت اعرف من زمان ان الملك فاروف مش زي ما احنا متصورينه
تعرفي زى برده فكرتنا عن هارون الرشيدي مثلا

ع العموم خير

تحياتى
تمر حنة

Unknown said...

zordeak:

اها واضح كده فعلا يااحمد

وانا كنت استغرب اوي لأني كنت عارفه ان الناس كانو مبسوطين وعندهم اخلاق

لازم تكون ماشفتوش ولا كنت عايز تسيب الامتحانات وتقعد تتفرج علي المسلسلات كمان؟؟؟

العفو ياسيدي انت بس تؤمر(:

Unknown said...

آلام وآمال:

يارب أمين

Unknown said...

Dr Emad:

مانت حتي لو مكنتش خايف من كده

كان هيبقي عيب عليك انك تسيب المذاكره وتقعد تتفرج عليه ياعماد

(:

فعلا فرق شاسع بين زمان وبين دلوقتي
وبين ملوك زمان وبين اللي بيحاولوا يعملو نفسهم ملوك بالعافيه دلوقتي

يارب أمين

Unknown said...

اسكندراني اوي:

كتييييييييييييييييييييييييييييييييير اوووووووووووووووووووووووووووووي

Unknown said...

FemTo:

وانت طيب يااحمد

هو بيتعرض حاليا علي حكايات وهو لسه بادئ عليها

Unknown said...

قلوب حائرة:

اها دي حقيقه والله

لازم يكون بن ناس ولازم يكون متربي دي تربية ملوك مش اي حد يابنتي

هو بيتعرض حاليا علي حكايات ولسه في اوله

(:

Unknown said...

abo salah:

بعد وعليكم السلام ورحمة الله وبركاته

فعلا هو كان كويس اوووووووي

انا ماتخيلتش انه هيبقي حلو اووووي كده

ماهم كتبوه زي ماهم عايزين عشان محدش يقولهم عملتو كده ليه؟؟؟

علي فكره انا بحب بيبرس وعارفه انه مش وحش بالعكس

اقولك علي حاجه كمان
انا ناويه اسمي ابني بيبرس ان شاء الله

(:

Unknown said...

أحمد عيسي:

انا مقدرش احكم علي اللي حصل في الثوره لأني معشتش الفتره دي

لكني بقرأ كتاب حاليا وناويه اني لما أخلصه ان شاء الله هقرأ مذكرات محمد نجيب

وأكيد هفهم منها حاجات كتيييييييير

Unknown said...

bastokka طهقانة :

هو في احلي من البازل

انا جايه اهو

((((((((((((((:

Unknown said...

soosa el-mafroosa:

(:

Unknown said...

يا مراكبي:

موصلش عندي ولا حرف

مش عارفه ليه كده

):

Unknown said...

oceaneyes:

يارب أمين

Unknown said...

تمر حنة:

في ناس كتير فعلا مظلومه

وحقيقي مش عارفه ليه كده؟؟

Amr Ahmed said...

انضحك علينا كتير جدا

فعلا زي ماقال انيس منصور

فاروق اتظلم جدا

ويمكن الفترة دي اتدفنت

اما نجيب فطلعوه ضعيف الشخصية مهزوز

لحد ما اتجنن

Anonymous said...

انت فتحتى موضوع كان نفسى اتكلم فيه بشدة
هبدا الاول من المسلسل كعمل تليفزيونى
انا تابعته مخصوص علشان المخرج اللى هو حاتم على لانى متابعاه من كذا سنة من ايام محمد بن ابى عامر وملوك الطوائف اللى بعتبره احسن مسلسل اتعمل وغيره والشئ اللى اتاكدت منه انه مبيغيرش فى الاحداث التاريخية ومش بيزود ولا يتفزلك ويقولك علشان النص الدرامى زى كل مخرجينا الكبار ومشهوش فى الشخصية زى ما شوهوا ابناء الرشيد وده بجد مخرج ترفع له القبعات
الحاجة التانية الضجة اللى اثيرت على المسلسل من الصحفيين على راسهم مصطفى بكرى المندمج اوى فى نظرية المؤامرة وان الملكية عايزة ترجع وحاجات كده حسستنى انه صحفى ضد الحكومة لكن مع الريس فى كل حاجة وانه مخه راح بعيد اوى
ولما تحدثوا فى العاشرة مساء

Anonymous said...

وقالوا ان المسلسل مبينش الشعب والناس اللى كانت بتنام على الرصيف وان مصر مش كلها قصور عندهم حق بس الناس ايامها كانت بتنام على الرصيف اما دلوقت فبيناموا فة عشش مصنوعة من الزبالة والمخلفات البشرية انهى بقى الاحسن

Anonymous said...

نييجى بقى للملك فروق كملك بغض النظر عن السلبيات اللى كانت فيه بس هو فعلا مكنش فى ايده الحكم المطلق للبلد اللى بيحكم البلد كان فى المقام الاول انجلترا بصفتها الدولة المحتلة ثم الوزارة ثم الملك وسواء كان عهده كويس او وحش فهما سؤؤه جدا وهدموا فترة من تاريخ مصر ومحوها من التاريخ
على فكرة فيه مصانع وحاجات كتير افتتحتها الثورة ومصانع وغيره كانت اساسا موجوده على ايام الملك ولكن لم تكن معلومه لكل الناس
وبعدين من بعد الملك واقتصاد البلد فى تدهور يمكن مبنش فى الاول بس نتائجه تراكمت واصبحت ظاهرة للعيان الان
وزى ما حصل فى عهد السسادات والزم والمساوئ لبتاعت عهد عبد الناصر اللى بانت فهما عملوا اكتر فى تشويه صورة الملك
وعلى فكرة موضوع الاسلحة الفاسد اتضخم جدا وخاد اكتر مما حصل فعلا ومكنش الملك المسئول عنه وحملوه لوحده الهزيمة فى الحرب وكان مصر لوحدها اللى كانت بتحارب مكنش فى غيرها من الدول واظن انه فاروق مش هيكون اسوا من ملوك الاردن وقتها واللى عملوه ومعى ذلك محدش قال عنهم حاجة ومازالوا للان بيعاملوا كابطال
وفى معلومة هقولهالك انت عارفة ان مصر على ايام الملك كانت بتبادل السلاح مع روسيا مقابل القطن المصرى اللى كان وقتها فى ازهى عصوره وكمان حاجة لو نزلتى القاهرة دلوقت فى الميادين الكبرى هتلاقيها كل شبر فى القاهرة بميادينها مجهز على يد الملك اسماعيل او محمد على او فاروق اللى كان من احسن ملوك اسرة محمد على

Anonymous said...

كل اللى انا قلته ده ليس مدحا فى الملكية او دعوة لارجاع الملك بس محاولة لتصحيح المعلومات الخاطئة التى نقلت الينا ومحاولة تصحيح تاريخ محى من الذاكرة ولكل عهد مميزاته وعيوبه سواء ايام الملكية او الثورة وما بعدها من ملكية مغلفة

الأستاذ said...

هو إيه الحكاية
الناس كلها دلوقتي بتتكلم عن الملك فاروق ليه؟
علشان المسلسل بس؟
ولا علشان تيم حسن عمل دور أحسن مما كان ممكن يعمله الملك فاروق نفسه
على العموم أنا كمان كنت مخدوع زي الكل
دلوقتي أنا مش بكرهه ولسة مش عارف أحبه ولا لأ
لكن بحب تيم حسن جداً
على فكرة أنا برضه كنت بقول إن محمد نجيب ملهوش ذنب في حاجة وكويس أو ملحقش يبين إنه كويس ولا حتى وحش لأننا معرفناش كير عنه لأنه ملحقش يحكم الصراحة
وعموماً أنا بركب من محطة محمد نجيب كنير وعادي يعني مش بكرهها
مع أطيب التمنيات إننا منتخدعش تاني في أي حد كفاية دول والشعب مخدوع في الكبيييييييييييير أوي
تحياتي

Unknown said...

إسووو ... فينك يابنتى وحشانى اوى والله

ربنا يسامحها الكلية اللى واخدة اللى بحبهم مني كدة

:(

بس بقا ياستى مسلسل الملك فاروق بجد تحفة وروعة وكفاية ان أمى اللى بتتخنق من المسلسلات التاريخية متبعاه بإهتمام ومش بتفوت حلقة وعاجبها اوى اوى اوى

تيم بجد ابدع .. كل ما اتفرق اقول الراجل ده يستحق جايزة بجد

Unknown said...

Amr Ahmed

بالظبط كده ياعموووووور

خيرالدين said...

انا كاتب عن المسلسل تقرير يا ريت تقولى رايك

Unknown said...

hend...hanady:

هو فعلا معتقدش انه غير اي حاجه في الأحداث

هو بس اول عمل يكون بيتمحور حول حياة الملك

قبل كده كان بيجي في شئ ثانوي عشان يبقي دوره وحش وبس

لكنه فعلا مكنش كده

ده مش مدح فيهم

ده توضيح لحقايق مغلوطه

وبعدين ماحنا كده كده عايشين في ملكيه

بس لملوك ماتربوش باخلاق الملوك

Unknown said...

الأستاذ:

هو فعلا تيم عمل دور عبقري

بس هو كان بيمثل حياة الملك

يعني ماجبش احداث ولا شخصيه من عنده

اللي مخلي الناس تتكلم عنه كتير انه قدم صوره غير اللي عشنا عمرنا كله بيقوللنا ان دي صورة الملك

ويارب ياسيدي ماتتخدع في حد تاني أبدااااااا

Unknown said...

إنـســـانـة:

انت كمان واحشاني

معلش الويندوز كان بايظ ومش بيفتح الايميل


اها تيم ده كده يعني من الأخر يابنتي

((:

امشي بقي بدل ماتجليبلنا الضرب (:

Unknown said...

e7na:

حاضر

هروح اشوفه اهو (:

كاميليا بهاء الدين said...

اول حاجة مدونتك جميلة خالص
وبعدين انا الحقيقة حصل لى لخبطة , يعنى قريت كتاب فاروق الاول ملك مصر مش فاكرة لمين وحسيت ان الملك فاروق يستاهل التشرد اللى عاشه اخر ايامه لبزغه الشديد اللى كان عايش فيه
وبعدين قريت على النت عن سطوه على خطيبة شاب مصريى (ناريمان) وتشريده للشاب ده هو وعيلته واهله
وبعدين خروج الملكة نازلى من الدين الاسلامى واعتناق المسيحية هى وابنتيها فتحية وفريال ارتدوا ايضا عن الاسلام

حاجة تحير والله
نصدق مين ونكدب مين؟؟

تحياتى لك

كاميليا

أميـــــ الحــب ـــــــر said...

السلام عليكم ورحمة الله وبركاته
فى حاجات كتير اوى فى التاريخ وصلتلنا غلط وبصورة مشوهه .. والله اعلم اذا كان الغلط والتشويه دا عن قصد ام بدون قصد .
ولكن .. ماذا بعد لكن .. لا اعرف .. فمن هارون الرشيدى الى فاروق وما خفى كان اعظم

والله انا خايف يجوا بكره ويقولوا ان مش السادات صاحب انتصار 73 وللا عبدالناصر مش هو اللى وقف قصاد العدوان الثلاثى 56 .. ولا ولا ولا ولا .. ربنا يستر وشكرا ليكى على الموضوع الجميل ده

أميـــ الحـب ـــــر

فبركة said...

هاااااااااااااااااى
أنا كاتب بوست عبرت فيه عن مشكلة البلد بحالها وبالذات الشباب وحطيت فيه حل الأزمة اللى كلنا عايشينها ومش عارفين نطلع منها أزاى
يمكن يكون حلى مناسب وممكن يكون غلط
بجد أتمنى أعرف رأيك فيه ضرورى جدا
عشان أتعلم من تعليقك عليه أيه مميزاته وسلبياته
بجد أتمنى قرائته والتعليق عليه
تحياتى

Unknown said...

كاميليا:

انت أجمل

احنا كلنا احتارنا

بس انت لو سألتي جدك او جدتك عن الملك هيقولولك انه مكنش وحش ولا حاجه

Unknown said...

أميـــــ الحــب ـــــــر:

وعليكم السلام ورحمة الله وبركاته

والله هو كل حاجه بقت ممكنه في الزمن ده

واللي يعيش ياما هيشوف

Unknown said...

فبركة:

انا قريته طبعا

ربنا معاك بجد ويوفقك ياشريف

son's egypt said...

السلام عليكم
ممكن يكون عندك حق
ممكن تكون ايام الممليكة افضل من الايام ديه علي اساس انهخ كن هناك احزاب وانتخابات اناس بتختار اللي يمثهم بجد مش بالغصب والسحل والضرب

Anonymous said...

طيب موضوع فاروق ده بالذات زى مبقول دائما مين بيكتب تاريخ مصر وهل بيتكتب بحياديه ولا بتتحكم فيه الاهواء

Unknown said...

son's egypt:

هي أكيد أحسن

لأن علي الأقل كان في معارضه وكانت بتقول اللي هي عايزاه

وكان ممكن الشعب يقول اللي هو عايزه

Unknown said...

رئيس جمهوريه نفسى:

اها

دي فعلا حقيقه

علوة said...

أعود للملاعب بعد غياب طويل لكل أحبابي

يا صباح الفل يا إسراء
بسم الله ما شاء الله
البوست بتاعك دايما قوي وبيقول

بس سؤال خفيف سريع
مين الملك فاروق ؟

صباح الفل

shabfa2re said...

المسلسل بجد حببنا كلنا فى الملك فاروق
الله يرحمه

Unknown said...

علوة:

حمدالله علي السلامه ياعلي

(:

صباح النور ياباشا

ربنا يخليك ياعلي

ده واحد كده كان ملك

بس ايه كان ملك بجد

Unknown said...

shabfa2re:

الله يرحمه يامحمود(:

 

The Lost Princess © 2008. Design By: SkinCorner