Thursday, May 3, 2007

ممكن تسامحه؟


أنا : عايزه أسألك سؤال.
هي ضاحكه: طب ماتسألي , من امتي وانت بستأذني قبل ماتسألي عن أي حاجه عايزه تعرفيها يعني؟
أنا: سامحتيه؟
هي مندهشه: سامحته؟
أنا : أها سامحتيه؟
هي: ليه انت عايزاني أسامحه؟
أنا : أها
هي: طب عايزاني أسامحه علي ايه؟
علي خيانته ليا؟ ولا علي غدره بيا؟
يمكن عايزاني أسامحه علي كذبه عليا
أسامحه علي انه باعني, ولا انه سابني؟
علي جرحه ليا ولا علي انه كسر قلبي.
طب يمكن أسامحه علي الأيام اللي أنا شفتها؟
ولا تقصدي علي العذاب اللي اتعذبته؟
ولا علي انه خلاني انسانه تعرف ماتسامحش, وانا اللي عمري ماحد عمل فيا حاجه وحشه الا وسامحته.
طب أسامح ازاي وهو حتي ماقلش انه أسف, ولا قالي سامحيني؟
طب هو لو كان في مكاني وانا عملت فيه ربع اللي عمله هو فيا كان هيسامحني؟
طب انت بتطلبي مني اني أسامحه ازاي؟
ده انت الوحيده اللي عارفه كل حاجه حصلت.
طب أسامحه ازاي وعلي ايه؟


كان نفسي أرد عليها وأقولها حاجات كتير, كان نفسي أقولها بردو سامحيه, أها هو صحيح مكنش هيسامحها, بس كون الناس وحشين ده مش مبرر لينا عشان نكون وحشين احنا كمان.
كان نفسي أقولها فوايد اللي يسامح, واننا لازم نسامح عشان ربنا يسامحنا.
بس مقدرتش أقول أي حاجه من دي, أصلي هقولها ايه؟ وفعلا انا الوحيده اللي عارفه كل حاجه.
هي ماقلتش لبقيت صاحبتنا الحقيقه, جميلتها عشان تحسن من صورته في عيونهم, مقدرتش تتخيل ان حد يقول عليه خاين, وأنا فهمت ده, وعشان كده أنا كمان مقلتش.
كلهم مش فاهمين ليه هي مش مسامحاه, ومش قادرين يصدقو انها ممكن ماتسامحش حد, كتير واحنا معاهم بيكون نفسي أقولهم أصلكم مش فاهمين حاجه, بس ماينفعش اني أتكلم, ماينفعش انها تحافظ علي صورته وانا أشوهها, ولازم اني أحترم رغبتها.
كتير مكنتش بفهم هي مش مسامحاه عشان فعلا اللي عملو, ولا عشانه حتي ماطلبش منها انها تسامحه.
أتمني ان يجي يوم تقولي فيه أنا سامحته.
تفتكروا هتقدر؟

68 comments:

SomeOne said...

طب ما هي كده تبقى مسمحاه بس مش عايزة ترجعلة

لو مكانتش مسمحاه
كانت كرهته
ومكنش همها منظره ولا شعوره
ولا اي حاجة

هي مسامحة في اللي فاتت
بس مش عايزاه يتكرر

:)

Esmeralda said...

احيانا الغصه اللى فى القلب تمنع اى تسامح

Reemo said...

ساعات بيكون الجرح كبير اوى وغائر اوى
لدرجه انه حتى لو كنا عايزين نسامح مبنقدرش
وساعات من كتر ما بنسامح بنفقد القدره على التسامح
بنكون استنفذنا كل الطاقه اللى جوانا
اكيد هى لو هتقدر تسامحه مكنتش استنت تساليها
بس اكيد هى مجروحه اوى علشان كده مش قادره تسامح
ربنا يكرمها وينزل الصبر فى قلبها

Eric Matt said...


ذكريها دوما أن خيرهما من يبدأ بالسلام أو كما قال رسول الله صلى الله عليه وسلم

تحياتي لك من ماناساس البلد

الكلام نوعان :كلام فارغ وكلام مليان كلام فارغ said...

مش عارفه ليه بحس ان كل ده حوار بينك وبين نفسك
بس مش مهم الحوار بين مين ومين المهم ان فعلا انتى وقفتى الكلام على لسانى انا كنت هاقولك خليها تسامحه بس بعد لما قريت البوست كامل اقولك لا ماتسامحهوش عشان اللى يشوفه وربنا بينتقم منه يتعظ لان دلوقتى جرح الناس بقى سهل اوى وسهله خالص ان واحد يكسر قلب واحده
بوستاتك هايله جدا

Unknown said...

مش من الطبيعى تنهى البوستات بسؤال مباشر للدرجة دى.
بس الطبيعى ان الانسان يقف قدام نفسة فى وقت ويسألها. لحد امتى هفضل احسن منهم؟ ولحد امتى مش بعامل حتى الناس القريبين منى جدا بمعملتهم؟ لحد امتى هى هتفضل كدة؟
بوست جميل، احييكى عليه

Anonymous said...

اسراء
احيانا التسامح بيبقي صعب اوي لو فعلاا انجرح جرح كبير تحياتي علي بوستاتك الجميله

الملاح التائه said...

تسامحه
هو التسامح أظن مرتبط باي شخص بيكون بينا وبينه ود إتسبب بغبائه في وقت من الأوقات في قطعه وعشان ما يعود الود أو يتنسي الجرح ولو عشان تبقى العلاقه عادية من غير قرب حتي
بنسامحه
إنما شخص أنا عاوز أسقطه من حساباتي للأبد ومش عاوز أعرفه نهائي بعد مصيبه عملها . مع شخص زي ده
مافيش داعي لوجود الكلمه أصلا
لأنها مش منطقية
فهنا يستوي التسامح مع عدمه حيال هذا الشخص
صح ولا غلط يا سمو الأميرة ؟؟

مصر هى أمى said...

فى مواقف معينة الشخص بيصعب عليه حالة جدا بيدمر نفسيا اما بتجيله الخيانة من حبيب
صدقينى يا اسراء ربنا ما يوريكى الموقف ده بيبقى صعب جدا انك تسامحى
بالعكس مع مرور الايام وخصوصا انا اللى فهمته من البوست بتاعك ان الانسان ده مش فارقة معاه حاجة يبقى ازاى عايزاها تسامح

مش لازم نضغط على احبابنا علشان نجبرهم يسامحوا حد ميستاهلش

تــسنيـم said...

يا بنتي نحن نغفر فقط للذين نريد لهم أن يخرجوا من حياتنا... لا نحمل ضغينة لمن أسقطناهم من حسابتنا.. جرحهم لنا لم يؤلمنا لأنهم لايملكون المنزلة التي تؤلهم لأن يظلوا محل سخطنا.

لايجرحنا أحد إلا بمساعدة أنفسنا لأننا أنزلناه منزلة لم يكن ليستحقها.. فإذا ما أرجعناه إلى حجمه الطبيعي زالت المرارة من الحلق والغصة من القلب واكتشفنا فيما بعد أننا قد نسينا ما فعل وأننا سامحناه.

سامحناه لأنه لم يكن ليستحق أن نتركه يؤلمنا ويشغل بالنا وليس لأننا استعادتنا قدرتنا على المغفرة.

Aladdin said...

لو "فعلاً" بتحبه أكيد هاتسامحه (مهما عمل)!!

AHMED SAMIR said...

والله دي بقى اختلافات فردية
ممكن ناس تكون بتسامح مهما حصل وتلاقي ناس تانية مابتعرفش تسامح وتغفر الهيافات حتى
individual variations
تحياتي ليكي

•«ρяoιd»•™ said...

مش اي قد حد يقدر يسامح

ومش علي اي حاجه نسامح

انتي عارفه يعني ايه خيانه ؟!!؟

اللي يخون ده معتقدش انه يستحق السماح

ده اللي بيخون بلده بيعدموه

طب و اللي يخون مشاعر انسان و يجرحه بالشكل ده يستحق ايه

تحياتي

زحل الفلكي said...

اي حاجه ممكن تسامح فيها
الا الخيانه
اصل اللي بيخون مره
لو وجد اللي يسامحة
حيقدر يخون تاني ثالث ويلاقي القدره جوه نفسه انه يعملها

لكن غير كده ممكن تسامحة انه فهم غلط او اتصرف غلط لكن الخيانه
معتقدش ممكن

عين ضيقة said...

لا

بلاش تسامحه

خليها تبدأ من جديد
وتنساه

ومع الوقت مش هيبقى فيه داعى للمسامحة ولا غيرها

مش لازم علشان مش سامحته تكرهه
بس لازم علشان جرحها تاخد وقت وتبدأ مع حد أحسن كتير

المهم...........الاختيار الصائب

تحياتى

BinO said...

سؤال متأخر جداً
جداً
يعني سؤال وأجابة مافيهاش أمل
يعني سؤال تقضية واجب
واضح انه ماكنش يستاهل
أو في حد فهم حاجة غلط
بس اللي جه بالساهل
يتباع في لمح البصر

حصان بري said...

فيه مبدأ ان العفو لمن يستحق العفو
او ممن يقدر علي العفو

بس من يقدر علي العفو لايسامح الا من يطلبه
فهو علي الاقل يريده

اعتقد مش هتسامحه
وده هو الصح في الحاله دي

elkamhawi said...

اظن لو طلب منها ممكن تسامحة

Amany Y. El-Saeed said...

بصي يا إس...في ناس كتيييير بتسامح من غير حدود...لكن كونه هو يخليها متعرفش تسامحه...فأنا شايفه إن ده وارد جدا...وارد جدا يكون في الإنسان إللي بنحبه حاجات جميله و نموتها فيه بالتدريج...و يوم ما ميقدرش يعملها معانا...يبقى أي حد هيهون عليه

أنا مش معاك ياشادي...في ناس كتير ممكن متسامحش ناس تانيه على أخطائها...بس مش بالضرورة تكون كرهتها...و إللي يشوه صورة إنسان أو يسمح بتشويهها لمجرد إنه كرهه...يبقى إنسان ملهوش أمان

Unknown said...

شادي فايد:
لأ ياشادي ماعتقدش انها سامحته خالص
هي بس من النوع ده, اللي مش عشان انسان غلط في حقها, يبقي تشوه صورته, حتي لو كان بالحقيقه وهو يستاهل ده
هي أكيد مش عايزه ترجعله, ولا اللي حصل يتكرر, لكنها كمان مش مسمحاه.

Unknown said...

Esmeralda:
أعتقد كده فعلا

Unknown said...

REEMOO:
فعلا عندك حق
ويارب أمين

Unknown said...

The Groom:
أنا مش عايزاها تصالحه, او حتي ترجعله
هي بس تسامحه

Unknown said...

الكلام نوعان :كلام فارغ وكلام مليان كلام فارغ:
عشان يعني انا الوحيده اللي عارفه كل حاجه
لأ اصل انا أصحابي كده, بيخصوني بالحاجات الحلوه د

من جهة ان جرح الناس بقي سهل اوي فده للأسف حقيقه, مش عارفه الناس بقي مالهم
ربنا يخليكي, وتحياتي

Unknown said...

محمد بدرى:
معرفش لحد امتي
بس زي ماقلت, كون الناس وحشين ده مش مبرر عشان نبقي وحشين زيهم
انا عارفه ان في أوقات بيكون الجرح اكبر من الاحتمال, لكنه بيرجع يعدي, ولازم نفضل أحسن

Unknown said...

fares:
أكيد يافارس
ربنا يخليك

Unknown said...

الملاح التائه:
أعتقد فعلا انه صح

Unknown said...

مصر هى أمي:
عارفه والله يامحمد
وعارفه هو اد ايه موقف صعب
أنا والله مكنتش عايزه أضغط عليها
انا بس صعبان عليا انه يكون السبب في انها ماتعرفش تسامح
أعتقد ان تأثيره لازم يكون أقل من كده بكتيييييير في حياتها
هو مايستهلش انه يغير منها كده.

Unknown said...

تسـنيم:
احنا ممكن نخرجه من حياتنا, وننسي انه كان في يوم من الأيام موجود فيها, لكن اعتقد ان مش شرط نكون خلاص سامحناه

Unknown said...

Aladdin:
المشكله ان هو قتل الحب ده جواها خلاص

Unknown said...

A.SAMIR:
طب والناس اللي دايما بتسامح
ويحصل معاها موقف يخليها ماتعرفش تسامح؟

Unknown said...

•«ρяoιd»•™:
انا فعلا طول عمري شايفه ان الحاجه الوحيده اللي الانسان ماينفعش يسامح عليها هي الخيانه
بس زي ماقلت, انا بس صعبان عليا انه يكون ليه التأثير ده في حياتها, انه يكون السبب في انها ماتعرفش تسامح

Unknown said...

زحل الفلكي:
تفتكر ان الخاين مستني ان الناس تسامحه عشان يخون تاني
الانسان اللي بيعرف او يقدر يخون ده عشان هو خاين بغض النظر عن تصرفات اللي حواليه

Unknown said...

عين ضيقة:
أنا كمان عايزاها تبدأ من جديد وتنساه, وهو بالفعل خرج خلاص بره حياتها
لكن كان نفسي انها تكون لسه بتقدر تسامح بنفس قدرتها السابقه

Unknown said...

BinO:
هو فعلا شكله كده ماكنش يستاهل ولا ايه

Unknown said...

حصان بري:
أعتقد ان احنا فعلا أحيانا بنكون محتاجين طلب العفو عشان نقدر نسامح

يعني انت شايف كده؟

Unknown said...

elkamhawi:
بس شكله مش هيطلب
ماهو لو كان هيطلب كان طلب خلاص

Unknown said...

أمـــاني:
معرفش ليه فكرتيني بيها لما قلتله , انا لسه بحبك, وياريت ماتقتلش الحب ده جوايا
لكنه بردو قتله

هي ماكرهتهوش, لأنها مش بتعرف تكره
لكن ده مايمنعش انها مش مسمحاه

ibn nasser - ابن ناصر said...

المسامحه ليه درجات مش كل حاجه يتسامح عليها ..لأ مافيش
تحياتي

كراكيب عادل said...

دائما اختاري ان تكوني الافضل

معها او معة او هي معة

السماح جميل ولو صعب نبعد من غير خصام ندي وقت للايام هتداوي

buffy said...

aked msam7ah bass mtday2a we dah 72ha ya3ny

Unknown said...

ibn nasser - ابن ناصر:
أكيد هي درجات
وأكيد مش كل حاجه يتسامح عليها

Unknown said...

كراكيب عادل:
اكيد السماح حاجه حلوه جدا
بس للأسف بيكون في وقت صعب علي الانسان انه يسامح

Unknown said...

buffy:
هي مضايقه
وده فعلا حقها
بس هي كمان مش مسمحاه

Anonymous said...

حرام لما نقول انها تسامحه وهوانسان ميستهلش احنا بشر في الاول والاخر

شهيدة said...

معاك حق يا اسراء

الموقف صعب
انك تعرفي القصة الحقيقية الكاملة وفنفس الوقت تتمني لو ان صديقتك تسامح عشان تكون هي الأحسن

بس انا لو مكانها وهو عمل كل ده ما كنتش حسامح

تحياتي

حصان بري said...

الي ان يطلب العفو
وساعتها هتسامحه
لم يطلب = لا يستحق
ده لو متاكده ان غلطه كبير فعلا

shabfa2re said...

تسامحه وتنساه

LAMIA MAHMOUD said...

عارفة انا فاهماها

فاهمة يعني اية متعرفيش تسامحي .. ما هو اصهل حتى ما قالهاش سامحيني ما اعتذرش

اقولك حاجة .. مرة اميرة صاحبتي قالتلي اية اكتر حاجة بتضايقك لما بتحبي .. قلتلها كل اللي يومها فرحته معاك بيعذبني

عشان كده هي مش عارفة تسامح .. لما حد يحول حتى الحاجات الحلوة لحاجات بتفتكريها توجعك

رغيت انا اوي

أحمد said...

هى قالت

طب أسامح ازاي وهو حتي ماقلش انه أسف, ولا قالي سامحيني؟


وانتى قلتى

كتير مكنتش بفهم هي مش مسامحاه عشان فعلا اللي عملو, ولا عشانه حتي ماطلبش منها انها تسامحه


المشكلة كلها انه ما رحش ليها وطلب السماح , هى كل عايزاه أنها يديها الفرصة انها تقول
"
جانى وطلب السماح
"
زى ما صباح بتقول
لكن هو ماطلبش السماح
يبقى هى لا يمكن هتسامحه
لو سامحته يبقى عشان تنساه مش أكتر

Unknown said...

قلوب حائرة:
اها أكيد احنا بشر
أنا طلبت منها طلب كبير صح

Unknown said...

شهيدة:
أه والله صعب جدا
يعني انت كمان مش هتسامحي

Unknown said...

حصان بري:
هو مش غلط غلطه كبيره
هو غلط غلطات كبييييييييييرة

Unknown said...

shabfa2re:
هبقي أقولها

Unknown said...

LAMIA MAHMOUD:
ارغي ياسيتي زي مانت عايزه
هو انت بتيجي كل يوم

فعلا احساس وحش ان حتي الحاجات الحلوه تبقي بتوجع
مش كده

Unknown said...

مبرمج حرك
تفتكر ياحمد ان ده السبب
أعتقد انهاممكن تنساه من غير ماتسمحه

كلبوزة لكن سمباتيك said...

ليها حق متسامحهوش

انا كمان مش مسمحاه

تحياتي

الحصان الأسود said...

زمان قالوا ان اللي بيحب بيسامح

لكن دة كان زمااااان

اللي بيحب عمرة ما حيسامح

عمرة مايسامح عالغدر و الخيانة و الندالة و الهجر و غيرة و غيرة و غيرة

SomeOne said...

أنا مررتلك تاج
:)

Anonymous said...

لو تأملنا كثيرا فى الكون
هنعرف
ان اى شىء ممكن نغفره
طالما تاب المذنب

أخف دم said...

شوفى يا إسراء
أنا شايف ان مجرد اقتناعها بإنها مش هترجعله يبقى تسامحه وخلاص .. لأنه لو هوه وحش أو خاين بالطريقة دى يبقى مايستاهلش انه أساسا يتحط فى الدماغ ..

.:.-=- ELGaZaLy-=-.:. said...

التسامح عايز قوة مش ملك كل البشر

Unknown said...

Sampateek:
انت كمان
ده كده حسابه تقل أوي

Unknown said...

الحصان الأسود:
حلوه ده كان زمان دي اوي
فعلا الغدر والخيانه والنداله حاجات وحشه جدا, خصوصا لما تيجي من حد قريب منك, او من الانسان الوحيد اللي مش بتكون متوقع منه ده

Unknown said...

شادي فايد:
حتي انت ياشادي
ماشي ياسيدي
مقبوله منك

Unknown said...

أحمد مختار عاشور:
طب ولو ماتابش ياحمد؟

Unknown said...

أخف دم:
هو مش في دماغها
هي بس شايفه انه حتي مايستهلش انه يعيش وهي مسامحاه, او ان ذنبها يتشال من عليه

Unknown said...

.:.-=- ELGaZaLy-=-.:.:
تفتكر ان كل البشر يستحقوه؟

 

The Lost Princess © 2008. Design By: SkinCorner