Saturday, February 17, 2007

ألة الزمن


أه اسم البوست ألة الزمن
بس أنا لسه ماخترعتهاش, وكل اللي بيتقال عني اني حفيدة انيشتاين دي مجرد اشاعات ومفيش منها حاجه حقيقيه
نيجي للجد بقي
كل الأفلام اللي بتتكلم عن ألة الزمن أو السفر عبر الزمن أو حتي الناس اللي جايه من المستقبل, بيشتركوا في حاجه واحده وهي ان الأرض خلاص ادمرت.
يعني بتختلف الأسباب والنتيجه واحده, مره يكون السبب حرب الفضائين , أصل الأرض ناقصه حروب عشان الفضائين هما اللي يدمروها, ولا هما يعني مش عاجبهم كوكبهم وطمعوا في الأرض بتاعتنا, أو إن جالنا نيزك من الفضاء بيحمل أمراض وتنتشر بسرعه علي الأرض عشان تنهي الحياه عليها, أو بسبب حروب البشر نفسهم مع بعض, ربنا يخليلنا ماما أمريكا, أو بسبب انفجار القمر اللي أدي الي دمار الأرض.
أنا بقي مش عاجبني ده, هما ليه شايفين المستقبل علي انه دمار وحروب وخراب, يعني ليه مش بنتعلم من اخطأنا ونحاول نخلي بكره أحلي وأحسن, ليه مش بنحلم بالمستقبل ان الناس عايشه فيه بسلام وحب وأمان والحرب بقت موضه قديمه والدول بقت بتراعي بعض, وبطلنا نظام الغابه اللي احنا عايشين فيه ده.
طب هو مين اللي صح, هما اللي شايفين ان الدمار هو مصيرنا, ولا أنا اللي شايفه ان بكره هيكون أحسن عشان احنا عايزينه يبقي أحسن ولأننا لازم نوصل للي بنتمناه
أتمني اني أكون أنا اللي صح.
أما بقي لما أخترع ألة الزمن فأنا مش هروح بيها المستقبل, لأ هرجع الماضي, أصل الماضي أهم وهو اللي بيحدد المستقبل, ورغم اني مش عارفه وقت الجد هغير الماضي ولا برضو هعيشه زي ماكان, لكني عارفه اني هرجع أصل في ناس كان نفسي أعيش معاها مده أطول وأسيب معاهم زكريات أحلي.
انتو لما هتستليفوها مني , هتروحو بيها فين؟

58 comments:

mahmoud said...

هيييييييييييييييييييه
انا اول واحد يعلق
انا معاكى فى انى هرجع للماضى عشان اعيش الاحداث بشكل مختلف
اولا هرجع ليوم مش هنساه ابدا هو يوم حفلة
live Aid
و دى الحفله اللى عملها بوب جيلدوف عشان يلم تبرعات لانقاذ اطفال المجاعات فى وسط افريقيا..الحفله دى بتعتبر اهم حدث فى تاريخ الموسيقى على الاطلاق و استمرت 16 ساعه على الهوا و تم جمع ملاييييييين الدولارات, الموضوع ده انا هعمل عنو بوست انشاءالله و هكلمك باستفاضه اكتر
و بالمره هعدى جنب المدرسه و اتفرج على نفسى و انا رايحلها..لو شفت نفسى بشترى الجرنان هضحك اوى عالعيل اللى من يومو رافض يعيش سنو

----------
بوست حلو موووووووووووووت
تحياتى

أحمد said...

هو ده الكلام أنا بحب حاجة أسمها رمزية الخيال العلمى و الة الزمن بالذات والفلسفة اللى وارها وبتغاظ أووى من اللى مش مقتنع بالحوارات دى .. مش عشان أنها ممكن تحصل أو لأ .. عشان ده أهانة للأدب الراقى اللى وراها .. إلة الزمن فلسفة فبل أى شىء سواء هتتعمل أو لأ ... ليه بقى هما شايفين المستقبل أسود كده .. من عمايلهم.. الأنسان كل ما بيزيد ظلمه وخصوصا لما بيكون مفكر دايما بيحلم بمستقبله الأسود كعقاب حتمى لأعماله الشنيعة سواء فى تعامله مع البيئة و الطبيعة أو تعامله مع أخوه الأنسان شوفتى فيلم "معالى الوزير" .. هو ليه كان بيحلم بمستقبله الأسود فى صورة أحلام شنيعة كأنه ركب ألة زمن بيترجعه فى أول أحلامه للماضى عشان بعد كده تقوله مستقبله فى أخر أحلامه .. طبعا ده نتيجة أفعاله الشنيعة و فى النهاية بيرتكب اللى أبشع من أحلامه بأن يقتل هشام عبد الحميد .. نفس الفكرة ونفس العالم اللى بيعملوا أفلام عن ألة الزمن هما نفس الناس اللى بيلوثوا البيئة و يخترعوا قنابل نووية اللى كوكب الأرض مش منتظر أكتر من الضربة القادمة اللى هتنهيه .. ضربة نووية واحدة بس وبالسلامة على كده .. نفس الناس اللى بيعملوا أفلام خيال علمى عن ظلم الأنسان لأخوه الأنسان فى المستقبل هما نفس الناس اللى قتلوا أخوانهم البشريين فى العراق فى الماضى وفى الحاضر والأهم من ده كل عارفة الحديث الشريف اللى بيتكلم عن أن اللى بيحب لقاء الله بيحب الله لقاءه و أن اللى بيكره لقاء الله بيكره الله لقاءه .. طب هو ليه بيكره لقاء الله .. طبعا من أعماله الهباب سواء فى نفسه أو مع أخوه الأنسان أو اذا كان أساسا مؤمن بالله فطبعا ولأن الأنسان فى أعماق أعماق روحه فى عهد مع ربنا "ألستُ بربكم" فهو بيبكى فى أفلام الة الزمن على مستقبله اللى بيسطره دلوقتى بيبكى عن أنه مش معترف بوجود إله أو بعيد عنه وفى نفس الوقت روحه من جوه بتزأر زى النمر الجريح وهى بتنادى على الل خلقها

أنا بقى هعمل أيه بألة الزمن هنفصل عن العالم اللى أنا عايشه تماما هتبقى أبحار بلا حدود فى ماضى البشرية ومنكرش أن أيدى هتاكلنى على الضغط على أزار المستقبل على الرغم من أن ده هيكون فيه نهايتى

مصر هى أمى said...

اسراء
انا لو استلفت منك الالة ديه هارجع بيها لايام سيدنا محمد نفسى اشوف الدعوة كانت عاملة ازاى والصعوبات اللى شافوها والفتوحات
بس لو الالة مبترجعش للوراء اوى كده ممكن ارجع لحد حرب اكتوبر واشوف الحرب وشعور الناس اللى فى الشارع
بس عموما فى اى زمن للوراء هيكون احسن بكتير من ايامى اللى انا عايها دلوقتى
مبروك على البوست

.:.-=- ELGaZaLy-=-.:. said...

همممممممممممممممممم

جميل اوى البوست يا اسراء بس لو فكرنا شوية..هنلاقى ان الزمن حوالينا ماشى بمنطقية غريبة ...

كل الامور تدار بيد خلاق عليم...

فكما ان اثار السير تدل على المسير

فكل ذالك الكون يدل على الخلاق القدير...

فلو فكرة او منطقية فكرة اله الزمن

بتاعت الحاج اينشتاين المجنون العبقرى دة

الى زود الابعاد بعد رابع وهوا الزمن ..لوقدر حد يتحكم فى الابعاد دى..
هاتبقى قوية ...


بس اعتقد انة لو ينفع يسافر هايسافر للامام فقط...لانة مفيش خلف..

ولال كنا احنا قابلنا نفسنا واحنا صغيرين ...وانقذنا مواقف كتير


يعنى لو الزمن رجع وانا قابلتنى وانا صغير


اكيد هقولى اعمل حجات كتير

المهم بالنسبة للفكرة كلحلم وكدة..وبعيدا عن الكلام المجعلص...

فانا نفسى اروح للرسول صلى الله علية وسلم..واشوف الصحابة ,,بعيونى

ونفسى اشوف بابا الله يرحمة مرة ثانية...

ونفسى اعمل حجات كتير

وحاليا نفسى اخش انام لانى لسة جاى من برة


بوست جامد يا اسراء بجد

Anonymous said...

فكره جميله يا اسراء

طبعا افضل الرجوع للماضى

يا سلام لو ارجع لحظه اذكر فيها الله وافتكر صلاه اغفلتها او تاخرت عن ادائها

ياسلام لو ارجع لحظه مع ناس غاليين فى حياتى اسمع لهم اكتر واقعد معاهم اكتر

يا سلام لو ارجع لحظه اصحح من خطائى فى حق غيرى واعيد تفكير فى مصيرى

بس للاسف لازم الرضا بما هو كائن ومحاوله التخطيط للمستقبل

Unknown said...

Moody:
أها انت فعلا أول واحد, رغم اني بقالي فتره مابقتش أول واحده عندك بس تتعوض ان شاء الله (:
كل مده بكتشف انك انسان أكتر يامودي, يعني التوقيت والمكان اللي رجعتله والسبب كمان بيأكد ده, ودي حاجه كويسه جدا بس للأسف بقت قليله شويه الأيام دي
بس طول عمرك مثقف وبتقرأ جرايد ها, مش كنت عشت سنك أحسن (:

Unknown said...

مبرمج حر:
كلامك فعلا صح, والانسان هو اللي بيحدد مستقبله واللي بنعمله النهارده هو اللي بيرسم مستقبلنا بكره, ويمكن عشان كده أنا اخترت اني أرجع الماضي.
بس الغريبه فعلا ان أمريكا هي اللي شايفه في أفلامها ان الحروب هتدمر العالم ورغم ده ماحولتش انها تغير من المستقبل ده أو تحسنه, بس أرجع وأقول هو الانسان كده.
جميل أوي وصف ابحار بلا حدود في ماضي البشريه, أكيد في الزمان اللي عدي حاجات كتير كنا نتمني نعيشها أو حتي نحضرها, وجميل اعترافك انك ممكن تدوس علس زراير المستقبل, أصل أكيد في فضول من باب أشوف بس أنا هوصل لايه أو هعمل ايه عشان يعني لو في حاجه مش عجباني أبقي أخد بالي منها (:
تحياتي

Unknown said...

مصر هى أمى:
جميل أوي انك تحب ترجع أيام الرسول, بس السؤال احنا نقدر نستحمل اللي هما استحملوه, أصل أنا كتير بحلم اني أروح هناك, بس بخاف اني أضعف قدام اللي هما شافوه(:
وبعدين ازاي الأله ماترجعش ورا أوي كده انت بتشكك في اختراعاتي, عيب عليك كده .
أقولك حاجه, انت الوحيد اللي تقدر تغير أيامك دي وتخليها أحلي من أي زمن عدي أو تسيبها كده أي حاجه تانيه أحسن منها, افتح قبك للحياه لأن دي الحياة الوحيده اللي انت هتعيشها, للأسف مالناش عمر تاني.

Unknown said...

.:.-=- ELGaZaLy-=-.:.:
انت عارف انهم فعلا بيقولو ان انيشتاين اخترعها, وانه خاف من الانسان واللي ممكن يعملو لو وقعت في ايده وانه عشان كده دمرها ودمر كل رسوماتها, وماسبش عليها أي دليل , والراجل طبعا عنده حق .
أما بالنسبه للصحابه والرسول عليه الصلاة والسلام ماتقلقش طالما انت نفسك تشوفهم أوي كده يبقي هتشوفهم في الجنة ان شاء الله, من غير ماتحتاج لألة زمن, وان شاء الله هناك برضو هتشوف باباك, وكفايه كده وماطولش عليك عشان تنام تصبح علي خير (:

Unknown said...

shiko :
فعلا احنا لازم نرضي بالموجود دلوقتي (:
بس اكتشافتنا اننا عايزين نرجع الماضي تخلينا ناخد بالنا من الحاضر ونعيشه صح عشان مانتمناش اننا نغيره هو كمان لما يبقي ماضي.
تحياتي.

Ahmed EIssa said...

المشكلة ان الواحد لومعاه اله الزمن حيستعملها زي الاتوبيس..حيروح في اماكن كتيييييير قوي

انا شايف اساسا ان المستقبل ضلمة وان اكيد في حرب حتقضي علي كل حاجة عارفه ليه؟لان الارض لازم تنضف..ومش حتنضف الا بحاجة تقضي علي كل اللي فيها

فكرة جميلة يا اسراء..بس انتي مقلتيش انتي حتروحي فين في الماضي وايه اللي حتغيريه

Anonymous said...

لا الرجوع للماضى ولا الهاب للمستقبل احسن كلاهما مثل الاخر ولن نجد احسن من عيش الحاضر بكل ما فيه من مصاعب وكوارث ومأسى ورفقة الاصدقاء ولمة العيلة فكل زمن له عيوبه الخاصة به ومميزاته المعينة على قضائه

تــسنيـم said...

أنا شايفة إن لو معايا ألة زمن هرجع أنا كمان لورا وهدور على فترة كانت فيها الأرض هادية ومليانة سلام وأمان .. هروح ليوم احتفظت منه بذكرى حلوة وضحكت فيه من قلبي، هروح لحد أنا غلطت فيه وظلمته عن غير قصد وأمسح اللحظة دي على أساس إني مهما اعتذرت الألم الناتج عن الظلم والتجربة دي مش بيضيع، هرجع علشان أمسح ناس معينة من حياتي لأنهم مأضافوليش حاجة هما بس خدوا كتير، هرجع لفترة سابت جوايا دلوقتي حنين للسعادة اللي كنت عايشة فيها وهعيشها تاني بنفس تفاصيلها بس يمكن أحاول أطولها شوية وأستغل اي فرصة فيها، هحاول إني أرجع للأيام اللي لرتكبت فيها ذنوب أنا معترفة بيها وأحاول إن أمنع نفسي من ارتكابها على أساس إن الذنوب نوعين نوع بنغفل عنه ونوع بنكتشفه ونفضل نستغفر عنه ونحاول إننا نمحيه بالاستغفار من صحيفتنا، هرجع لأيام الكلية وهستمتع بيها ومش هضيعها على حساب أي حاجة تانية.. بس اللي متأكدة منه إني مش هرجع لفرص ضاعت مني في أي حاجة لا مذاكرة ولا شغل ولا ارتباط ولا أي حاجة من دي لأني عارفة شكل حياتي بعد ما الفرصة ضاعت لكن معرفهاش عاملة ازاي لوكنت نجحت واقتنصت الفرصة..

المهم بقى إني الفترة اللي فاتت كنت بردد بصورة دورية حكاية إني محتاجة ألة زمن .. إنتي عرفتي منين :))

أحمد said...

معرفة المستقبل هى الدمار المحقق للأنسان لأن لو مستقبله فيه خير .. حاضره هيبقى كسل و تراخى و أستهتار و تهور ولو مستقبله فيه شر .. هيبقى واقعه إكتئاب و هم و غم ولو مستقبله مزيج وده الطبيعى طبعا فيحاول أنه يغترف من الخير
ويبتعد عن الشر كأنه بيحاول يحقق الجنة على الأرض وده متعارض مع غاية من غايات الخلق اللى هى التجربة و الخطأ للوصول للحقيقة

أحمد الشمسي said...

موافق على كلام مبرمج حر بلا تحفظ. الضمير الجمعي للعالم كله بشوف المستقبل على انه دمار! مش بس عشان التجربة اثبتت ان الإنسان مش بيتعلم من أخطائه، لا كمان عشان معزم معتقدات اهل الأرض بتقول بحرب نهائية تدميرية (سواء سموها هرمجدون او اي اسم تاني) وكمان عشان العلم احيانا بيقول كده (آخر تقرير لمجلة فوكس العلمية بيقول ان يوم هتيجي الشمس وتنطفي في خلا لماعرفش كام سنة) فطبيعي ان اللي يفكر في آلة الزمن هيشوف المستقبل على انه دمار وخراب.

Unknown said...

أحمد عيسي:
حلوه هتستعملها زي الأتوبيس دي.
بس ليه شايفه اسود كده, هو صحيح الأرض المفروض تنضف, بس انت لو فكرت كويس هتلاقي ان الأرض أصلا مكان الشر يعني عادي انها يبقي فيها الناس دي.
وأنا قلت اني هروح الماضي (:

Unknown said...

hend:
أكيد طبعا الأفضل اننا نعيش الحاضر لأنه هو اللي قدامنا وهو اللي هيبقي الماضي بعد كده, وهو اللي هيحدد المستقبل(:
بس وقت الجد ماتجيش تستليفيها أوكي .

Unknown said...

تسـنيم:
جميل أوي الأماكن والأوقات اللي عايزه ترجعيلها, ولأني لسه ماخترعتهاش أتمني انك تستغلي الحاضر دلوقتي وتحققي فيه كل اللي انت عايزاه عشان مانحاوش نرجع الماضي تاني.
أما عرفت منين انك محتاجه ألة زمن, يمكن لأنك مش انت بس اللي محتجاها, واللي فهمته ان الناس كلها مش عجبهم الزمن ده وبيتمنو لو نرجع لورا تاني, مش عارفه العيب في الحاضر دلوقتي, ولا في الطريقه اللي احنا عايشينه بيها, بس زي ماقلت هو عمر واحد بس اللي هنعيشه, للأسف مافيش واحد نجرب فيه والتاني نعيشه .

Unknown said...

مبرمج حر:
المستقبل هو الناتج الطبيعي لتصرفتنا النهارده, يعني اللي مستقبله جميل ومليان خير , ده اكيد عشان هو بيشتغل كويس دلوقتي, والعكس صحيح, وعشان كده أنا شايفه ان معرفة المستقبل مش شئ ضروري لأنه ممكن يتغير مع كل تصرف انا بعمله.

Unknown said...

أحمد الشمسي:
أكتر حاجه عجبتني جملة ان التجربه أثبتت ان الانسان مش بيتعلم من أخطأه, وللأسف دي حقيقه واقعيه , أما حرب أخر الزمان فمعروف ان في حياه بعدها وهتكون حياه كويسه جدا كمان.

elkamhawi said...

انا شايف ان بكره عمره ما هيكون احسن ده اولا
وثانياً انا هرجع لزمن الكفار اه والله دول كانوا ناس دماغ خمر ونساء ووقد بنات
وميسر وحاجة فل
عشان انا على طول بفكر انى ارجع مثلاً للزمن بتاع الكفار ده ومعايا موبايل ودى فى دى ورشاش وعربية اخليهم يجننوا وكل يوم بفكر فى كدة واقعد اضحك

vision said...

بوست جميل اوى يا ايسوووو

انا هروح هروح؟ عاوزه اطلع قدام فاللمستقبل وانجز عشان نخلصحياتنا بدرى بدرى

مهو الواحد مش هسياخد زمنو وزمن غيرو

انا بيتهيألى ان بعد الدعوات الى كل رمضان وليلة 27 الجوامع بتدعى فيها والناس تقول امين على الظلم انو ينتهى ربناانشاء الله يستجيب وده عشمى فى ربنا سبحانه وتعالى يارب بجد ده حلم ونفسى اشوفو مش بع دما اموت يعنى

Unknown said...

elkamhawi:
ايه التفاؤل اللي انت فيه ده؟
وحرام عليك ياراجل, عايز ترجع زمن الكفار, كمان, وكمان عايز تروحلهم بالتكنولوجيا الحديثه, خليهم يقولو عليك ساحر بقي, بس معلش أنا مش هديك ألة الزمن , أنا أخاف أشيل ذنبك يامان .

Unknown said...

camera_girl :
ربنا يخليكي يارافعه روحي المعنويه انت وشايفه ان المستقبل وردي, مش كده برضو , أمال يعني دعوتنا دي كلها هتروح فين؟
بس انت الوحيده اللي قلتي انك هتروحي المستقبل, شاكلك عايزه تنجزي أوي, ربنا يوفقك.

متغيرة شوية said...

أعتقد ان المستقبل - القريب على الأقل- هيكون فيهدمار
لأن احنا ماشيين من سيء لأسوأ
الهمجية بتزيد ، والانسان مبقاش ليه ثمن

Memo said...

معلش انا هاجرها عشان اغيظ بيها توتشي ابن الجيران هوا و البت كيكي عندهم عجله بكلكس
و بعدين يعني هما لفتين و هلاقي الدنيا مش جايبه همها يعني
بس ايه ده انتي مالك صحيح ايه الافكار الغريبه دي
انا مش قلتلك متطلعيش في الشمس اليومين دول خطر عليكي
تحياتشي يا جميله

Unknown said...

متغيرة شوية:
هو فعلا الهمجيه بتزيد, وللأسف الانسان فعلا ماعدش ليه ثمن, بس ان شاء الله بكره ممكن يكون أحسن, عشان احنا عايزينه يكون كده.

Unknown said...

Memo:
ازيك يابنتي, وفين جديدك؟
ان كان علي توتشي وكيكي يبقي هديهالك طبعا, ويمكن تجيب همها, مين يعرف.
وحاضر ماعنتش هطلع في الشمس تاني.

Unknown said...

فكرتينى فليم اسمه butterfly effect الجزء الاول منه فى رأئى رائع جدا وبيتكلم عن وجهة نظرك. وان الرجوع بالزمن للخلف اهم من انه نروح بيه للأمام

Unknown said...

محمد بدرى:
يعني انت كمان كنت هترجع ورا؟

عاشقة الوطن said...

يااسراء
آلة الزمن انا هاروح بيها على الحاضر عشان نفسي أغيره لو ينفع أغيره يعنى
احنا نفسنا فى مستقبل احسن زى ماانتى بتقولى
وياااااااااااريت يكون فعلا احسن
ويكون فيه الحرية بقيت موضة قديمة
واحنا اللى نتحكم فى مصيرنا مش الغريب هو اللى يتحكم فينا

كراكيب عادل said...

مش محتاجه كلام علي ست سنين عمري عدل

بس مش هلاقي اصحابي هناك

وهضر ارجع تاني لا ويمكن تتعطل مني الاله دي ومش هعرف اصلحها

هطر اسف اني اخد حد يكون عارفلها كويس يا تري مين يا تري مين ؟؟

Mony The Angel said...

ana shoft al post da awel ma3melteeh asasan :)
bas ma3ala2tesh b2a :(
tab3an enty akeed 3arfa qesety m3a alet alzaman :)
eny narga3 lel qarn al 18 7aiso antamy :)
bas u know, i think if i got it now, i'ld travel to the future not to the past :)
3aiza a3addy al emt7anaat welsana alzeft de :D
wagy ba3daha b2a, ba3d maikoon kol haga etzabatet w kda :)
bas law gat ba3d 3 sanawee b2a yeb2a haroo7 lelqarn al 18 7aiso antamy lol

الملاح التائه said...

يا سلاام
عن نفسي هارجع ايام عبد الناصر
وهاحضر كل حفلات ثومه
واسمع الأطلال لأوول مرة من الست سنة 66
ولو الأله بتاعتك فيرجن حديث
هارجع لأيام أرسطو
لما كان بيكلمهم فى أثينا عن الخير والشر بس
بوست جميل يا اسراء

moodysalihamidzic said...

جميل الموضوع اوى
نفسى ارجع ايام اعدادى وابتدائى
اقول لانسانة انى بحبها وما اسيبهاش خالص
وادخل ادبى مش علمى

shabfa2re said...

نفسى ارجع لرمضان اللى فات
اصلى بحب القطايف اوى
D:

LAMIA MAHMOUD said...

ياااااااااه .. ارجع لزمان اويييييييي ايام الستينات مثلا


بس جامدة الفكرة وجامد الاسلوب
وداخلى البوست تخطف

Anonymous said...

حلمك جميل .. لكن
للأسف لما هترجعي بآلة الزمن للوراء لغاية بداية وجود الحياة على الأرض راح تلاقي إنها صراعات في صراعات حتى اليوم
تاريخ الأمم هو تاريخ الحروب والمواقع .. التاريخ كده والحاضر أهو قدامنا
يبقى المستقبل ممكن يكون إيه؟

أكيد استمرار للصراع الذي يخلقه ويقدم عليه الأقوى والأخس حلقا

يالا ربنا يهنيك بأحلامك الجميله .. يا ريت .. يا ريت كنت أقدر أشاركك فيها
أرق تحياتي

-_- said...

هروح زمن النبي صلى الله عليه وسلم

Unknown said...

عاشقة الوطن:
حبيبتي انت الحاضر بالفعل لسه في ايديك, وتقدري تعيشيه بالطريقه اللي تعجبك وتختاريها, لكن لو كان تقصدي الماضي, يبقي رأي اننا نخلي حاضرنا حلو عشان لما يعدي مانحاولش نغيره لحد ماخترعها (:
وأكيد ان شاء الله هيجي اليوم اللي نقول فيه ان الحريه موضه قديمه, واننا احنا واحنا بس اللي بنحكم حياتنا .

Unknown said...

كراكيب عادل:
مانت لما هترجع لست سنين , أصحابك هيبقو صغيرين برضو, وهتتعرف عليهم من أول وجديد, وبالمره عشان لو كنت اتعرفت علي حد واكتشفت انه مش يستاهل, ماتعرفوش من الأول أحسن.
بالنسبه للصيانه أكيد هديك كورس تعمل معاها ايه لو حصلها حاجه, وممكن نقضيها موبيلات , رغم ان زمان مش هيكون في شبكه, بس ندورلها علي حل, يعني عملنا ألة الزمن ومش هنعمل شبكة موبيل, دي تيجي برضو.
نورتنا.

Unknown said...

فكرة البوست جميله جداً

انا عن نفسى لو هستلفها هروح بيها لايام الثوره علشان اترجى جمال باشا و كل اعضاء الحركه انهم ميقوموش بيها و يسيبونا فى الاحتلال

اكيد كان هيبقى ارحم من الى احنا فيه

تحياتى

Unknown said...

Mony The Angel:
موني, فينك يابنتي؟
ده انا قلت انك أول واحده هتردي علي البوست ده, ينفع كده؟
ياعيني عليكي يأختي, خلاص 3 ثانوي عقدتك, معلش مرحله وهتعدي, وبعد كده هتكتشفي انها كانت أيام حلوه خالص (:, أه والله
وطبعا من عيوني هرجعك القرن ال 18 حيث تنتمي, ده انا هخترعها عشانك انت أصلا ياجميل.

Unknown said...

الملاح التائه:
أيام عبد الناصر, يعني أيام مجد العرب والكرامه.
وطبعا ألة الزمن بتاعتي فيرجن حديث جدااااا
يعني روح لأرسطو وانت مطمن (:

Unknown said...

moodysalihamidzic:
طب ايه رأيك انك تقولها دلوقتي انك بتحبها, ولو كان خلاص كل واحد راح لحاله, يبقي اللي تحبها المره الجايه تقولها علي طول, وماتضعيش الأيام عشان مانضطرش نرجعها تاني (:

Unknown said...

shabfa2re:
القطايف, عايز ترجع عشان القطايف,
ماشي
بس في محلات بتعملها حتي لو مش في رمضان.

Unknown said...

LAMIA MAHMOUD:
بس اشمعني أيام الستينات يعني (:
وعلي فكره أيام الستينات مش زمان أويي, ده في ناس هنا رجعت للرسول, وناس رجعت لأرسطو , وناس عند أول الخلق (:

Unknown said...

إبن بهيه:
يعني ماكنتش كلها حروب أوي, كان في أيام هدوء وسلام, ويمكن المستقبل يتغير من باب اننا زهقنا من القتل والخراب والدمار.
أنا كمان كنت أتمني انك تشاركني فيها, وتبقي الحياه لونها أفتح شويه (:

Unknown said...

Sharm:
عليه الصلاة والسلام.

Unknown said...

whyme:
تصدق هو فعلا ممكن يبقي أرحم, علي القل هنعرف نقاومه.

shabfa2re said...

لا معلش مفيش زى قطايف مامى

Anonymous said...

انا اللي لفت انتباهي ان علي طول سكان الفضاء دول مشوهين و شكاهم مرعب اوي 00
انا اصلا بكره النوعيه دي من الأفلام
و صحيح علي رأيك هي ضاقت بيهم الدنيا جم هنا

buffy said...

ana nfsy aro7 3asr magda we fatn 7mama we elnas de msh 3arfa bass 7ba kda awy b3den albs fostan mn bto3 zman dol wow

Unknown said...

shabfa2re:
طبعا أنا مقدرش أتكلم علي قطايف مامي (:
ابقي سلملي عليها كتير .

Unknown said...

koukawy:
أها هم فعلا دايما شكلهم غريب, مانت عارف بقي ماينفعش يكون في حد أحلي من سكان الأرض.
طبعا طمعانين في الأرض, عشان جمالها والسلام والأمان اللي موجودين الأرض.

Unknown said...

buffy:
انت كمان عايزه تلبسي فستان من بتاع زمان, أصل منة أختي عايزه تلبس الفستان المنفوش بتاع القرن ال18.
أوكي ياسيتي هبعتهالك تروحي بيها هناك (:

Amany Y. El-Saeed said...

جميلة أوى الفكره دي يا إس
عارفه...أنا لو معايا آلة الزمن دي...مش هستعملها...لأنى حياتي إللي فاتت أنا عشتها وشفتها و حبتها بحلوها ومرها و لو غيرت فيها هبقى مش أنا...و مش عايزه أعيش في الزمن إللي قبل ما آجي الدنيا كان...و المستقبل لو فقد غموضه تبقى الحياه ممله
بيتهيألي أي إنسان عنده شعور حقيقي بالرضا لو جاتله الفرصه...مش هيستخدمها
بس في سؤال...تفتكري لو حد استخدم الآله دي وغير حاجه حصلت في ماضيه...هيضيع إحساسه بإن دي كانت حاجه و هو غيرها؟؟؟ أصل لو الإحساس هيفضل موجود...يبقى الآله دي للفضولين فقط

Unknown said...

أماني:
أنا طبعا كل أفكاري حلوه (((:
مش ضروري تكوني عايزه تغيري في حياتك ياحبيبتي, بس في لحظات ممكن نكون نحب نعيدها, أو نحب اننا نطولها شويه.
وأعتقد اننا لو غيرنا حاجه, هنعيش علي الجديد علي طول, القديم هيبقي كأنه مش موجود ومحصلش أصلا.
وحمدالله علي السلامه ياجميل وماتبقيش تغيبي تاني (:

 

The Lost Princess © 2008. Design By: SkinCorner